[2018世界盃陣容討論]《西班牙 - 改朝換代前的最後反撲》 精選 深度

歐聯決賽曲終人散，2017/18球季暫告一段落，球迷可以稍事休息兩星期，養精蓄銳迎接四年一度嘅盛事。

筆者雖然兩年無寫過文，但大戰在即都想同各位波友講吓波經，嚟緊就會同大家討論吓各大熱門嘅可能陣容，希望各位都俾啲意見同支持。
首先出場有2010年盟主西班牙。先寫鬥牛兵團嘅原因係，縱觀今屆各國大軍名單，西班牙最能夠俾到「啱數」嘅感覺筆者。望完成個名單，第一個反應係「不多也不少」，無乜邊個落選/入選會令人詫異或可惜。盧柏迪古選人明顯以本土球員及其狀態為大前題，一眾今季演出欠佳或缺乏穩定上陣機會嘅外流球員，如莫拉達、查維馬天尼斯、法比加斯、馬高斯阿朗素、柏度、馬達、比爾連等都榜上無名，「本地薑」中落選嘅沙治羅拔圖、域度奴、伊拿拉文迪及柏列祖等人都未有明顯優勢，屬情有可原之舉。

陣容預測：
4-3-3
剛續約至2020年嘅盧柏迪古上任18場未嘗一敗，當中以4-3-3為最常使用陣式。

門將︰迪基亞


呢個位置其實毋需多講，「聖基亞」近年高水平嘅穩定演出，已經征服所有球迷嘅心。尤其喺紐亞因傷長抖呢段期間，視迪基亞為當今最佳門將(沒有之一)相信亦難有爭議。門將呢個位置，亦係西班牙對比上屆世界盃提昇得最多嘅位置，畢竟當年完敗荷蘭一役，卡斯拿斯可謂老態盡現。
後防︰艾巴-碧基-拉莫斯-拿祖

四人防線本來亦係亳無懸念，不過傷癒不久嘅卡華查喺歐聯決賽再度受傷，令呢個「皇巴配」出現些微變化。右閘應屬拿祖同艾斯比利古達之爭，考慮到近期熱身賽嘅輪換次序，再加上球會隊友有加成呢一點，（以及盧柏迪古對車路士球員投閒散置呢一點，)相信前者出任正選機會比較大。至於皇家蘇斯達小將奧迪奧蘇拿，則會成為二人之後備。

拉莫斯同碧基呢對歡喜冤家，將會繼續鎮守西班牙中路

值得一提嘅係，今次大軍名單中，有3個閘位球員亦可串演中堅，包括上述兩位通天老倌拿祖同艾斯比利古達，以及今季助攻助守都表現可人嘅阿仙奴左閘蒙維爾。可以想像，如果卡華查無受傷的話，8位後防球員就可以當成4個右閘，5個中堅，4個左閘嘅組合使用，呢種靈活性應付大賽可謂妙到亳巔，同時亦可以解釋到馬高斯阿朗素同比爾連名落孫山嘅原因。

中場︰恩尼斯達-布斯基斯-艾簡達拿

雖然最近兩場對德國及阿根廷嘅友賽，高基取代咗因傷落選嘅影帝，不過筆者相信無損後者出任正選嘅機會，始終布教授為西班牙帶嚟嘅經驗、視野及節奏掌控，係一眾新人未能媲美。

當然，以馬體會二人組高基同沙奧尼古斯嘅活力同潛力，某程度上係值得因應對手實力取代上述三人，但強調控傳踢法嘅西班牙，面對強敵時應該會繼續用上「拉馬西亞」中場線。

前鋒︰伊斯高-迪亞高哥斯達-大衛施華
莫拉達貴為外圍賽神射手(5球)，未能入選固然惹起最大爭議，但若果跟迪亞高哥斯達回到馬體會後嘅表現比較，莫拉達的確輸得心甘命抵。咁艾斯柏斯同洛迪高呢？喂，人哋喺國內聯賽都分別入到22球同16球，真係唯有學一班網民所講，留喺皇馬做賓斯馬後備咪好囉。

如果，命運能選擇…
兩翼由伊斯高同大衛施華出任，後備席上有華斯基斯同阿辛斯奧候命，呢個豪華配置相信只有法國嘅陣容先比得上。當然，正選二人喺球會都更傾向打攻中位置，一旦球隊轉打4-2-3-1甚至4-4-2，都完全唔會有適應問題。


結語︰西班牙陣中多位主力係08-12年皇朝嘅功勳元老，小白、大衛施華、拉莫斯、碧基、布斯基斯等都好大可能係最後一屆參與世界盃，自然希望可以再次捧起大力神盃。至於喺接班方面，由馬德里雙雄聯袂中前場，情況總算令人放心，反而係中堅位置上，就未見有具備大賽經驗嘅世界級中堅可以頂上。換言之，從整體實力上，西班牙未來似乎有走下坡趨勢，今屆世界盃正正係改朝換代前嘅最後機會，可以一洗近年恥辱。