巴城戰:曼城的第5次敗北 文字

講到今早凌晨的歐聯夜,曼城又一次對巴塞,巴塞過往已經連贏曼城4次,今次去到第5次,相信各位城迷應該預料會輸波,但最起碼今次會知恥近乎勇,不過曼城仍然是當時的曼城,天生註定是巴塞的歐聯私家雞,而今場相信是眾多城迷見過最差的巴城會:淨吞4蛋的敗北收場。(註:柏帥領軍的曼城前四次對巴塞沒有一次會失多過2球,但哥帥一仗失4球,可謂毫不樂觀)

比賽開始頭10分鐘相信是巴塞的熱身時間,但6分鐘的時侯,艾巴受侵犯傷出,巴塞不得以用一個換人名額,本以為曼城可以把握一下機會,豈料巴塞成功突破曼城後防,而費蘭甸奴回防時竟突然一跣,造就美斯單刀射入1:0,而接近上半場完結時碧基亦因傷告退,巴塞亦已經使用2個換人名額,可惜比數仍然維持1:0完半場。

下半場開始後約5分鐘,巴禾將波誤傳蘇亞雷斯,蘇亞雷斯打算用高波射入時,巴禾居然犯下禁區外手球,被球證判直紅離場,未來3場歐聯停場,同時薩巴列達亦告受傷,因此換入後備的卡巴尼路,可惜約10分鐘後美斯再次入波,將比數擴大至2:0,再到68分鐘,蘇亞雷斯突破曼城,再橫傳予美斯造就帽子戲法,不過哥迪奧拿就算此時正式換入阿古路就無助局勢完全偏向巴塞一方,及後巴塞有一次12碼機會,尼馬主射但被卡巴尼路擋出,接近比賽法定時間90分鐘時,尼馬將功補過為巴塞射入第4球。

上半場失波源於防中費蘭甸奴回防跣低後無迅速起身補救所致,但失波並未令球隊失去戰意,更有數球攻勢,其中根度簡亦曾扭過碧基射門,但未有成功射穿達史達根的十字關。但下半場才是曼城失敗的主因,巴禾衝出禁區控球,卻意外傳球予前隊友蘇亞雷斯,導致犯下領紅離場的低級錯誤:禁區外手球,同時薩巴列達亦告受傷,等同一下子失去2位球員,比起巴塞上半場已經使用2個換人名額更嚴重,令原本在上半場持有的戰意一瞬全失,亦導致不足10分鐘後被美斯梅開2度,被入第2球後令防守完全潰散,令巴塞於70分鐘左右就靠美斯帽子戲法領先至3:0,此時阿古路換入亦已經無助戰局改變。巴塞於比賽末段因曼城後防失誤致獲得12碼,不過尼馬射失,但於89分鐘將功補過射入巴塞的第4球,同時亦宣告比賽結束。

小編對此場賽事早已預料輸波的結局,亦預料巴禾(小編現稱其膠禾)會派膠,總猜不到巴禾這位經驗豐富的門將居然會犯下禁區外接球這種致命的低級錯誤,哥迪奧拿此戰相信亦有愧於賞識他但已經離世的告魯夫,畢竟哥迪奧拿曾說過沒有告魯夫,他不會知足球為何物,就小編所觀察,哥迪奧拿根本完全愧對告魯夫,當然哥帥初到英超時曾說過要學習英格蘭足球的特性,於10連勝時更希望球隊一敗以重整軍心,但現在已經2和2負,亦未見軍心有任何改善,反而哥迪奧拿照樣在落敗時亦維持其一成不變的控傳戰術,這才是曼城今仗再次失敗的原因,亦未能改變曼城是巴塞的「歐聯私家雞」的稱號。本週末曼城亦重回英超戰場,假若哥迪奧拿仍然不吸取今次敗北而回的教訓,相信落得球迷唾棄的機會相當大,小編希望球隊能夠知恥近乎勇,吸取教訓,否則上季季中宣布哥迪奧拿加盟的事情會令曼城高層引發無數的公關災難。
延伸閲讀:
曼城巴塞6合戰
標籤: 巴塞  曼城  哥迪奧拿  美斯  告魯夫  

留言

會員
我要評論
請按此登錄後留言。未成為會員? 立即註冊
  • Ker Yee Chock
    Ker Yee Chock 於 20/10/2016 評論 NO. 1

    對唔住,我係卧底。。。

  • Jackio Yang
    Jackio Yang 於 20/10/2016 評論 NO. 2

    雖然大敗比巴塞, 但其實表現好過之前幾次好多, 係差在把握力同巴禾做25啫

  • Chung Yu Ho
    Chung Yu Ho 於 20/10/2016 評論 NO. 3

    巴塞教頭買個巴塞龍門過你班友一棟 怪誰💤

  • Kenny Ho
    Kenny Ho 於 20/10/2016 評論 NO. 4

    多得佢

  • Lui Yik Long
    Lui Yik Long 於 20/10/2016 評論 NO. 5

    歐聯直紅都停3場架咩?

  • Luk Michael
    Luk Michael 於 20/10/2016 評論 NO. 6

    佢太比1神化啦,柏歷帶果陣起碼入到一球,話柏歷唔識教防守都無一次輸多過兩球,甘賓尼唔出阿古路唔出一堆中場(施華拖波慢仲要加多個拖波既根度簡,由其是施華次次打巴塞都好慢一拍,去到龍門門前死都要傳番出12碼點唔肯射))係中間同巴塞慢慢猜,老老實實巴塞而家都唔係慢猜啦,得迪布尼史達寧肯跑,人地成隊傳又得跑又快過曼城位又現得好,曼城個個等波刑拖兩拖先走位,邊有得打?以前拿施尼同而家根度簡搭施華一樣上腳。無耶耶好似無人識突破仲要唔出阿古路,琴晚球球加速過人突破都係史達寧迪布尼。

  • Desmond Chan
    Desmond Chan 於 20/10/2016 評論 NO. 7

    將巴塞領隊,隊醫,管理層買晒返來,結果都係咁, 不如直接收購巴塞啦!

  • Ken Chan
    Ken Chan 於 20/10/2016 評論 NO. 8

    誰贏你買/用誰係白痴,車仔前車可鑑(車仔用托利斯丶法卡奧已經當黑,韋利安也非想像中特別好只係車仔上季太差)

  • Zeroau Au
    Zeroau Au 於 20/10/2016 評論 NO. 9

    暴露左兩樣野
    1) 邊個教巴塞都自動波

    2)哥帥既眼光其實俾人神化

  • 工藤新一
    工藤新一 於 20/10/2016 評論 NO. 10

    柏歷堅尼對咗巴塞4次雖則係輸但都冇輸得咁樣衰,頂盡輸兩球,哥迪奧拿一帶就輸4球,仲唔係哥帥問題?

  • 高估
    高估 於 20/10/2016 評論 NO. 11

    佢係錯在交錯波,至於用手其實係門將本能反應。
    作為巴迷我又覺得呢場冇咩特別好講,幾球入波都唔算靚波,主要係曼城自己派膠,最有印象反而係薩巴列達傷,唔明點解會劏開嗰個位,宜家啲 Boot 真係薄成咁?仲有就係見到 on v 嗰吓醒咗醒。

  • Danny Tang
    Danny Tang 於 20/10/2016 評論 NO. 12

    哥帥自作孽不可活,本來一隊波入面大家職責分明,守龍就守龍,因咩要個龍玩控球!見巴禾呢條友經常可能為滿足哥帥而為控球而控球,並沒有分開邊D要控定交番出去、邊D要大腳解圍。Joe Hart今次笑了,他上星期拯救了英格蘭,今天他的替身送禮給對手,熟優熟劣好明顯啦!

  • Calvin Cheung
    Calvin Cheung 於 20/10/2016 評論 NO. 13

    係唔係想連勝十場之後十場不勝

  • Tsang Kwong Yip
    Tsang Kwong Yip 於 20/10/2016 評論 NO. 14

    如果巴禾喺踢一隊普通啲嘅球隊,或者非哥迪奥拿領導嘅球隊,可能佢第一腳就清咗個波出界輸界外球!

  • Hinpan Tang
    Hinpan Tang 於 20/10/2016 評論 NO. 15

    還我joe hart,上次作客魯營,hart已經表現身價能力,可擋住巴塞大部分攻勢。 所以著重係把關能力而不是門球能力。

  • Kam Fai Chan
    Kam Fai Chan 於 20/10/2016 評論 NO. 16

    擺到明 吾同級數

  • Samson Lau
    Samson Lau 於 20/10/2016 評論 NO. 17

    城巴之戰,九巴表示輕鬆

  • Andy Ng
    Andy Ng 於 20/10/2016 評論 NO. 18

    又係膠禾

  • Ben Lo
    Ben Lo 於 20/10/2016 評論 NO. 19

    其實大部份球隊對住巴塞都係捱打,d人吹光頭佬好神, 其實佢只係叫做有想法,真正神既係班波。

  • Ct To
    Ct To 於 20/10/2016 評論 NO. 20

    作為巴迷 睇晒全場 根本唔覺得哥sir有咩問題 哥sir知道巴塞進攻由後衛開始發動 交俾中場影帝轉守為攻 戰術上完全針對呢一點打 好多時候逼到巴塞大腳解圍 失第一球 費蘭甸奴咁樣線腳送大禮 場上11人打11人 根本55波 曼城有入肉攻擊 關鍵在於打少一個情況下 曼城全隊崩潰 哥sir戰術根本冇問題 但事實反應曼城級數真係同巴塞有距離 msn把握力太強

  • Jerry Kwan
    Jerry Kwan 於 20/10/2016 評論 NO. 21

    輸俾巴塞唔係咩醜事

  • Happy Lau
    Happy Lau 於 20/10/2016 評論 NO. 22

    近期好多人叫保方退休, 質疑佢嘅能力, 咁如果保方真係要退休, 呢個包和呢? 係咪應該要退出球壇, 返鄉下耕田?

  • Ben Poon
    Ben Poon 於 20/10/2016 評論 NO. 23

    呢場波反映咗4-3-3陣唔易踢,後段已經見到中場回場太慢,根皮力歇,而後防4人更加守唔住巴塞三寶,尤其一對中堅,尤如雪糕筒,相信哥師要諗計!

  • Matt Matt
    Matt Matt 於 20/10/2016 評論 NO. 24

    證明邊個教巴塞都係一樣

  • Jason Fung
    Jason Fung 於 20/10/2016 評論 NO. 25

    收哂貨,係巴禾on9

  • King Lam
    King Lam 於 20/10/2016 評論 NO. 26

    曼城戰術上贏左,巴塞多次迫到求其解衛,佢太了解巴塞,可惜史東斯呢d級數累事,要佢用控球上死得

  • Kenneth Ng
    Kenneth Ng 於 20/10/2016 評論 NO. 27

    落場始終係球員

  • Roy Ng
    Roy Ng 於 20/10/2016 評論 NO. 28

  • Li Se Yin
    Li Se Yin 於 20/10/2016 評論 NO. 29

    而我分不清 到底係巴塞攻線真係太強
    定係史東斯防守差

  • Terence So
    Terence So 於 20/10/2016 評論 NO. 30

    有睇波就知,作為巴迷,頭二十分鐘我嚇到賴屎,逼到巴塞控都控唔住個波,幾球差d輸,
    巴塞完全咬唔入,直到曼城派膠先安心d,頭三球到唔知點得返嚟

  • Ka Sing Chan
    Ka Sing Chan 於 21/10/2016 評論 NO. 31

    巴塞,蘇7,幹得好!

  • Marco Wong
    Marco Wong 於 21/10/2016 評論 NO. 32

    其實講巴塞自動化真係令巴迷失笑 巴塞有今時今日,哥帥其實真係功不可沒,上任就趕走左當時既細哨、迪高,再升B隊既影帝替代當時打得好好既耶耶托尼

    擺美斯打假九,艾維斯打右翼、前場六秒逼搶全部都係哥帥上任先有

    如果真係咁自動,佢走左之後,個助教教個幾場就唔會輸到hihi,馬天奴就唔會一個冠軍都無

    仲有一樣野,佢好嚴格控制球員體重,所以佢個陣走左之後第二季,美斯係肥左差唔多5KG

  • Johnny Cheung
    Johnny Cheung 於 21/10/2016 評論 NO. 33

    哥師跟本帶乜隊都唔會贏到巴塞,比宇宙仁你唔得,更何況曼城。

  • 藍白雲
    藍白雲 於 21/10/2016 評論 NO. 34

    本身曼城同巴塞係唔同級數,但哥帥太急進而導至失4粒,之前英超已經出現過巴禾同後防缺默契,唔加強防守打433,提高左後防被人射穿機率

  • Alex Wong
    Alex Wong 於 21/10/2016 評論 NO. 35

    嗱,老實講,巴禾發作前曼城其實幾對版既(包括巴禾),去到魯營打少1個,仲要遇着個識飛既美斯,真係神仙都難變

  • Joe Nim Cho Lau
    Joe Nim Cho Lau 於 21/10/2016 評論 NO. 36

    哥帥話想輸下嘛,心願達成了

快捷鍵:←
快捷鍵:→