香港年青球員政策該何去何從？ 精選 推薦

喺啱啱過去嘅周末，本地波舉行咗2場菁英盃準決賽，結果香港飛馬同和富大埔分別勝出，成功晉身菁英盃決賽。其實筆者十分喜愛欣賞菁英盃嘅賽事，因為呢個賽事係專為鍛鍊年青球員而度身訂造，睇住各位年輕球員珍惜難得嘅上陣機會努力爭取表現，筆者每次都會睇到好熱血呢。
不過諗深一層，呢種「鼓勵」年輕球員上陣嘅政策，又是否行之有效，令年青球員有出頭天？筆者呢次將會參考數個國家嘅年青球員政策，並且同而家嘅菁英盃作一個比較，以求找尋出最能幫助香港明日之星發展嘅方法。

香港 - 菁英盃
賽制：正選內如果有2名或以上嘅21歲或以下嘅球員(U22)，球隊可以出最多6名外援；正選內無2名21歲或以下嘅球員，只可以出最多4名外援
比賽數目：2015 – 2016年度菁英盃，9支球隊分開兩組踢單循環然後頭兩名出線踢四強淘汰賽，換言之每支球隊至少有3場菁英盃賽事，冠軍隊則最少有5場，最多6場菁英盃賽事。[1]今屆2016 – 2017年度菁英盃轉為淘汰賽，代表有球隊最快踢完1場即刻畢業，冠軍隊最少有3場賽事，最多4場賽事。[2]

菁英盃實行獎勵性政策，肯出U22球員即可以出更多外援，一來可以提升賽事可觀度 (前設係一般相信外援技術較好)，二來亦可以畀年青球員得到上陣機會。筆者觀察到呢兩屆賽事亦見有成效，年青球員漸漸嶄露頭角，例如U22「最強球員」大港腳陳俊樂、剛剛星期五踢得頗為出色嘅香港飛馬中場蕭俊銘，全部都從菁英盃得到一定嘅鍛鍊機會。
不過由於呢個係獎勵性措施，若果球隊唔出U22球員，其實只係跟隨番平日聯賽嘅出場限制，當係一般盃賽咁踢，好似東方龍獅呢兩屆都無U22球員，照聯賽咁用番4個外援踢，甚至輪換時起用後備踢菁英盃，結果被球迷譏笑為「耆英盃」。另外今年轉為淘汰制，有球隊踢完1場就畢業，比賽數目亦都大減，對弱旅嘅年輕球員幫助不大。
睇完香港，而家就參考下外國嘅年青球員政策啦。

中國 – 中國超級足球聯賽
政策：強制性正選要有一名23歲以下球員(U23)，外援上限為3名，不設亞援。

中國足協今年因應金錢足球過度泛濫，為咗遏止「炒風」，決定施行強制性措施，勒令每支球隊出賽時必須有一名U23球員，以及每場最多只能有3名外援，希望能保護年青球員嘅上陣機會。呢個政策實行之後，所有U23球員登時聲價十倍，連帶原本喺香港參與港超聯嘅R&F富力球員閔俊麟亦成功登陸中超，並成為貴州恆豐智誠嘅正選，同港腳法圖斯並肩作戰。[3] 咁樣睇嚟U23球員又真係好似多咗機會上陣，多咗同高質外援磨練嘅機會喎。但除咗佢之外，其他球隊又點樣應對呢個措施呢？原來有好多U23球員根本上出完正選好快就畀人換走咗，可見大多數中超球隊純粹滿足其政策要求，寧願浪費換人名額都未必畀年青球員上陣更多時間。另外，每場聯賽最多只可以出3名外援，某程度上亦影響出戰亞洲球會賽嘅球會利用聯賽作練兵磨合嘅機會。

英格蘭 – 英格蘭超級聯賽
政策：每隊球隊最多註冊25名球員，至少有8名Home-Grown Players (要16歲至21歲其間至少喺英格蘭青訓系統受訓至少3年)，另外21歲以下球員無需註冊於25名球員之中。 [4]

講到英超大家都好熟，但入面嘅球員註冊條例我估未必個個都清楚啦，但筆者相信有部份讀者有玩過Football Manager的話應該都對此條例頗為熟悉。呢個措施唔係從上陣角度出發，而係從註冊入手，希望球會重視本地青訓球員，出色嘅年青球員可被提拔至A隊，從輪換陣容中得到上陣機會。另外，雖然U21球員唔計算入25人大軍，但一支專業球隊正常嘅球員數目應該大約需要26 – 30人，所以正常計算亦有數位U21球員會於聯賽中輪換獲得上陣機會。
不過現時英超賽會醞釀改制，因為18歲嘅球員就可以循正常途徑加盟職業球會，去到21歲剛好3年成為Home-Grown Players，從而就能滿足註冊條例要求，所以非英籍嘅法比加斯、保羅普巴亦計算為Home-Grown Players，變相未能令英超球會重視英格蘭本地球員，亦令英格蘭國家隊人才逐漸凋零。[5]
越南 – 越南甲組足球聯賽 (V-League)
政策：每支球隊只能註冊2名外援及1名歸化球員 。[6]

1月25號亞冠盃外圍賽傑志對越南河內，河內只有2名外援在陣，雖然話另外2名外援未有隨隊，但其實佢哋喺本地賽亦只能夠最多出2名外援。而且仲加入歸化球員嘅限制，如果換轉落嚟港超嘅話我諗應該會好大迴響，特別係而家嘅香港隊係咁倚重入籍兵。但呢個政策就反而可以迫令球會重視本地球員，特別係年輕球員，喺2016年亞洲U19錦標賽越南已經入到四強，可見越南本地青訓漸見成果。[7]
不過由於本地賽只限2名外援，但出戰亞洲球會賽則最多可以容許3名外援加1名亞援，所以出戰球會亞洲賽嘅球會只好簽2名外援專門用嚟踢亞洲賽，結果大多時候造成資源浪費，而外援球員平日無本地比賽去維持狀態就去踢亞洲賽亦會影響球隊表現。
香港球會向來都甚為重視亞洲球會賽，出到亞洲賽都唔希望丟人現眼，所以我認為港超聯係唔應該削援，反而係跟番亞洲賽嘅出場限制，咁先可以畀香港球會熟習亞洲賽嘅規例，出到去先可以發揮到最好，為香港足球爭光。現時註冊5名外援加1名亞援出4個外援嘅規例我認為並無不妥，可以繼續維持。但點樣可以畀香港年青球員有更好嘅發展，筆者認為可以雙管齊下，註冊條例同上陣嘅陣容控制並行。

首先仿效英超嘅註冊措施，例如強制於A隊註冊3 – 4個U22球員，球員註冊數目下限23人，上限設為30人。現時大多數港超聯球會A隊球員數目為大約23 – 28人，23人下限、30人上限基本上照顧各隊需要。

然後菁英盃回復兩組單循環分組賽，提升比賽數目，同時條例作出更改，以出2名U22球員，出4名外援為中位數，U22球員上陣球員數目與外援掛勾，多一個U22球員就多一個外援，反之亦然。
外援數目U22球員
20
31
42
53
64

呢個情況下球會對本地球員需求會多咗，上陣機會亦都逐漸多咗，過多幾年就可以考慮喺另外嘅盃賽賽事都引入呢個賽制，而聯賽則繼續現有條例，將盃賽變為本地球員以至年青球員嘅鍛鍊舞台。

呢兩年香港年青球員無論喺菁英盃、以至省港盃，其實都證明佢哋有一定實力，可以立足港超、以至亞洲舞台，或者筆者提出嘅未算最好，但借鏡其他國家嘅措施，給予年青球會機會發展，我覺得又未嘗不可。唔知各位愛香港足球嘅朋友，你哋又點睇呢？
參考來源：
[1] 菁英盃賽制2015 - 2016：
http://www.hkfa.com/news_details/13192

[2] 菁英盃賽制2016 – 2017：
http://www.hkfa.com/news_details/14292/

[3] 【战报】贵州恒丰智诚1–1战平北京中赫国安
https://tieba.baidu.com/p/5017620256

[4] Squads for 2016/17 Premier League confirmed
https://www.premierleague.com/news/84136

[5] FA chief Greg Dyke plans to get tough on overseas-player quotas
https://www.theguardian.com/football/2015/mar/23/greg-dyke-fa-overseas-player-quotas
[6] Vietnam ready to kick off 2015 season
http://english.vov.vn/culture/vietnam-ready-to-kick-off-2015-season-284783.vov

[7] 2016 AFC U-19 Championship Schedule & Results
http://www.the-afc.com/afcasfeeds?view=all&id=175&type=Stage#ui-tabs-2

圖片來源：
https://images-sports.now.com/sport/news/7/297/17513436297/17529128003_600x400.JPG
http://img.mp.itc.cn/upload/20170116/91cf997b61424e9fa9fc1ba94bfc0598.jpeg
http://www.zqsports.com//UploadFiles/163img/2017-03/201703194224240830612657.png?imageView&thumbnail=550x0