[吹水文]淺說即將近約滿既老將

今季完結後，有唔少老將都即將約滿，而且盛傳不獲續約，今次筆者就講下其中幾個比較出名既，睇下佢地係咪無留隊價值。


第一個講返愛隊車路士，副隊長林柏特(Lampard)上次幾經波折終於得到留隊機會，續約一年。呢位保持住最多入球紀錄既35歲老將，已經唔再係正選既首選，體能無可避免地下降。打攻中都唔再係佢既位置，轉而係4-2-3-1之中既2，係防中位置中擔任近組織型既墮後中場。不過由於體能問題，加上佢攻優於守既特點，佢比較多後上進攻，就算位置感同防守紀律好，都唔算係好好既防中，唔同謝拉特(Gerrard)係利記既定位同作用。不過精神上佢始終都效了左13年左右，係老臣子兼副隊長，屬領袖分子，個人認為佢都可以留隊，就算做後備都好，佢係可以穩定軍心同提供經驗俾新一代既一員，不妨續多一次約，而之後佢應該都接近高掛球靴。

艾夫拿(Evra)都係曼聯王朝既老臣子，經驗老到，岩岩呢季由莫耶斯(Moyes)側重閘位後上進攻，令呢位33歲老將老態甚現，其實佢既表現都唔算失禮，陣中都算穩定既一員，係歐聯等賽事上發揮都幾好。不過當然，佢老左都係不爭既事實，曼聯都要收購返一個左閘接佢班，不過就算買左，佢都可以做到一個實力唔錯既後備，加上經驗上可以幫到將要換血既曼聯，而維迪(Vidic)、里奧費迪南(Rio Ferdinand)、傑斯(Giggs)等老一代或離隊或掛靴，球員中都要一位老將係更衣室同場上穩定軍心，哪怕佢戰力下滑，但精神上作用不可忽視，都可以續約留隊。

舒華沙(Schwarzer)就算年紀已老，但季尾表現睇黎都仲係唔錯既一個後備人選，就算佢無力再做返正選之材都好，起碼佢都係一名沙場老將，有一定作用。來年就算古圖斯(Courtois)回歸，或者施治(Cech)繼續把關，都無可能叫另一人打後備，前者留就後者走，後者留就前者續借多一年，點都要個後備門將，舒華沙都叫係英超打滾多年，有唔錯既經驗，又有一定作用，如果古圖斯留低既就更需要佢傳授英超既經驗同幫佢適應返環境，續約都係合適。

佩奧爾(Puyol)比較唔同，佢係岩岩呢季無乜點上陣，近年都上陣唔多，作用有限，雖然佢都有一定精神上既作用，隊中又係比較動盪既時期，但由於沙維(Xavi)等資歷不錯又上陣較多既老將在陣，佢既精神作用都下降，佢又傷患較多，無法上陣又佔據一個中堅位置，不如俾佢擔任管理職位或教練等位置，繼續效力反為更好。

至於其他球員好似G.巴利(Gareth Barry)都係叫加里夫，不過同(譯)名就唔同命，佢其實都打得唔錯，又有經驗，不過呢d球員同以上唔同，佢留隊既機會唔大，作用都無以上球員咁高，同其他又無咁出名，筆者坦白講句無咁熟，獻醜就不如藏拙，留俾各位判斷。