《「銀河唯一」的最後一擊 - 基奧特》

藍獅 於 11/02/2018 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

.圖片來源 : Daily Mirror

由紅轉藍,從另一支倫敦宿敵來投,基奧特並沒有背負著任何「叛徒」之名,阿仙奴球迷反而抱著感謝的心,希望佢能夠留在英超喺史丹福橋有更好既發展;巴舒亞伊被外借到德甲多蒙特,而車路士仍然需要三線作戰,與此同時莫拉達一直受背傷困擾,意味著基奧特在下半季必定有更好機會上陣,究竟依加既「銀河唯一」能幫助干地幾多呢?

意大利人需要柱躉中鋒已經唔係咩秘密,遠至祖雲達斯洛蘭迪,近至意大利國家隊柏利,在干地心目中選用352陣式既人員配置,最前線必定要有一名高大球員作支點,配合另一名以技術及靈活為重既球員作攻堅。而言莫拉達以及夏薩特都主要偏向技術型,難以用作支點分波,而外借離開既巴舒亞伊能力又未到位,驅使干地在由季初至今一直尋覓目標人選。

較令人意外既係,在冬季轉會窗開始無耐,傳出既名字竟然係安迪卡路爾、高治之流,更被其它球迷揶揄不如去NBA職業籃球搵人仲好,真係嚇到人心驚膽跳。過左無耐就開始傳到羅馬既迪斯高身上,當時藍軍有意思一氣過將迪斯高以及左閘既艾馬臣一同打包到史丹福橋,前者在今季歐聯兩回合大戰車路士既發揮相當出色,亦難怪藍軍對佢虎視眈眈。但車路士一直就球員既個人條款拖拖拉拉,不願意為年過三十既迪斯高開出多於兩年合約期,最終交易亦就此作罷。

而言車路士好快將目光轉投到同市競敵阿仙奴既基奧特身上,兵工廠有意收購多蒙特既奧巴美揚作補強,而蜜蜂兵團希望借用巴舒亞伊作頂替者,順理成章藍軍就可以從阿仙奴手上得到基奧特,而交易亦成功實現,可以話係三贏局面。基奧特個人技術或許不夠迪斯高強,但用作支點分波、頭槌二傳以至於高空轟炸都絕無問題,而且在英超效力經已踏入第五個年頭,對於聯賽既節奏以及適應力實屬無容置疑。如果以352為陣式基礎,佢與莫拉達或夏薩特作最前線攻堅相信發揮會唔錯。

「銀河唯一」經已三十有一,步入職業生涯的黃昏時期,只希望佢能夠喺車路士發揮得到自身水平,為藍軍力爭各項錦標。


文章最後更新時間 : 11/02/2018 16:30


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 基奧特  車路士  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→