【賽事分析】20191102 港超聯 ~ 元朗 1:3 大埔 - 完敗

元朗人撐元朗波 於 03/11/2019 發表 收藏文章
前鋒:18 祖連奴 38 葉子俊
中場:7 卡真奴 6 基斯 10 米基爾 23 黃晉軒
後衛:24 黎格爾 5 曾至孝 22 法比奧 84 彭超然
龍門:12 葉嘉宇
陣式:442
What I saw
雙中堅防守一場比一場更差,真係冇諗住轉吓三中堅嗎?認真講依家元朗隊戰術已經睇唔透,俾郭嘉諾套迫搶戰術迫吓就波都運唔到上前場,亂到七彩,得返兩邊傳中做攻勢,但前面係祖連奴同葉子俊,試問點同人地中堅鬥頂,還我辛坦拿喇。第一球失波真係好離譜,對面上嚟搶迫吓就搞得掂。
另外,明顯睇得出彭超然極不適應右閘,黎格爾一樣唔太踢得掂左閘,左右閘輪住被人爆,攞紅牌都可以講埋係自己申請,自己都知自己有黃牌,人地反擊,咁樣落鏟唔中波一定拎梗黃牌,真係希望下次避免再犯呢啲錯誤。曾至孝踢中堅真係炸彈嚟,至少5球派膠,前幾場推返上去踢防中咪幾好發揮囉。筆者都唔理解成隊發揮咁差係咩事,遊魂狀態,呢啲係球迷最討厭見到嘅。

筆者唔係好明陳文俊咁迷祖連奴踢最前做乜,基本上祖連奴唔係傳統攻擊球員,唔會做到支點,頂頭鎚更加唔係佢殺食,佢需要係1個沖擊型前鋒後面伏擊,當年有艾華頓。平心而論,凡係辛坦拿有正選,元朗隊發揮都唔錯,至少有分落袋,筆者不理解既然咁鍾意傳中,唔搵1.9米辛坦拿頂波係咩玩法?再者,落後緊唔換晒啲名額又係咩玩法?呢場係34歲葉子俊今季第一場正選,下半場好早已經睇得出佢冇晒氣,等同打少多個冇分別。其實上場菁英盃更勁,三個名額一個都冇用過,筆者真係黑人問號。
換人記錄
羅振庭>黃晉軒 46':頂返右閘
辛坦拿>卡真奴 70':根本要正選
?>?:儲落下場換?點解唔換後生仔攞經驗?
總括呢場無論排陣,用人,戰術都係理解不能,狀態差到一個點,希望陳文俊教練真係好好反思改善,球迷唔會接受咁嘅元朗隊出現。
#為元朗搏盡
#元朗人撐元朗波

標籤: 元朗  元朗隊  搏盡  元朗球迷  元朗人  

留言


請按此登錄後留言。未成為會員? 立即註冊
    快捷鍵:←
    快捷鍵:→