【開心足球】聯賽盃利物浦再贏一場

利永遠不會毒行 於 22/09/2016 發表 收藏文章
話說尋晚聯賽盃,打比郡對利物浦,贏波但小妹心情麻麻(女人一個月總有幾日係咁),今次寫得比較正經,希望大家見諒。

講返樣波,今次同預計都一樣,高普唔會出哂正選球員,用左傷逾復出既Karius、呀can,仲有之前有好多人都問過價既Ings都出左場,仲有古積同埋後備入替既青年軍Ejaria。

好啦,講入波之前,緊係講下靚仔新龍Karius既表現(心心眼)。
睇得出佢仲未同啲後街夾到可以做足100分,但係80分都走唔甩。因為都睇到佢交波有少少唔到位。係今場度睇到,佢位置感又的確好過米奴列,係利物浦進攻果陣,見到佢企位企得出過米奴列好多,客觀啲睇啦,呢個一來係有信心既表現。另外要讚既係係佢幫手救出左上場入左個世界波既軒達臣送出既中既小禮物-即係救左球(其實無咩威脅既半單刀)。

咁講下後衛啦之後,摩蘭奴呢位球員仲未學識寫「進步」呢兩個字,一進攻呢就走到無雷公咁遠,而其餘時間就平平淡淡,同過往表現相約。而Matip一如以往,成熟穩重,很好很好。而入左係利物浦第一球波既卡拉雲,嚴格黎講係人地幾個後衛掛住mark費明奴唔記得左佢同埋人地解圍失誤轉左俾佢再射波既時候撞左落打比群後衛隻腳入(好長,請自行加標點,放心,逗號唔會攰),佢反應快,回防都快,同Matip都幾夾,俾個LIKE你。

而成日俾小妹鬧既Lucas今場防守過得去,但略嫌有太多不必要既犯規。而係熱身賽受重要既古積就大部分時間都係駁下腳,可能緊張卦。
其實兩隊之間實力都懸殊,可以話利物浦係佔上風。今場利物浦啲前場著哂火咁, Origi就有啲心急,好在無傷大雅,要讚既係佢轉身真係幾靚,而係下半場仲接應古天奴既傳波信心一射網頂入波。古天奴真係好fit好charm,又入波又助功,射自由球都有板有眼(雖然好似唔中龍)。小妹會話今場係佢既表現賽,因為佢剩係上半場都show左唔少腳法、搶左唔少鏡頭,係精彩既。

又講下今場最佳拍檔古天奴(係又係古天奴)同埋費明奴,古天奴係中場甩左mark佢果個再傳個波俾費明奴,費明奴搵到空位再一個靚右邊俾返古天奴衝入去12碼點入波。雖然小妹睇古天奴都係side foot入,但係睇得出呢個巴西默契真係唔錯。

不過講到呢度,大家都要留意返,其實今場打比群既攻勢都唔強勁,班後衛應該係輕鬆面對;而佢地既防守都比較上亂,所以前鋒都容易搵到機會入波。贏3:0算唔算好波呢?睇到一班球員係踢得開心既,而今場既入波,唔計卡拉雲果球啦,另外都兩球入法都相似-今場無出既史杜列治都係招牌式有人向前傳(好似winning 㩒三角形制,小妹打過幾場有錯請提點)再快跑入禁區起腳。史毒同origi真係好似,今次出左origi踢哂全場,估計星期六對侯城會出史毒俾origi抖下(今場主力古天奴同費明奴同隊長都唔係踢足全場)。

今場收唔收貨大家自己諗啦,但人總會貪心,小妹都唔例外,0245起身睇波緊係俾多幾球入波我睇啦!


留言


請按此登錄後留言。未成為會員? 立即註冊
快捷鍵:←
快捷鍵:→