【轉會傳聞】高普有意迪比利﹑繼續為利物浦補強

利永遠不會毒行 於 30/05/2018 發表 收藏文章
今年嘅夏季轉會窗提早打開左,利物浦早兩日就成功係摩納哥簽入法賓奴,而今次既收購被外界認為係增強紅軍中場線的第一步,另一方面,由於安利簡離隊嘅機會十分大,所以其實買完法賓奴之後利物浦先算係填補返德國人既空缺。


當然除咗中場線之外,高普明顯仲想喺其他位置上補強,除左有早幾日傳話99%會加盟嘅費基亞之外,今日最新嘅消息係指高普有意目前身在巴塞隆拿嘅迪比利。小編就覺得高普買入前場攻擊手嘅決定好正確,因為始終文尼沙拿兩個其中傷一個之後,高普就無人可以用,所以今年夏天增強後備深度亦係高普要解決嘅問題。
講返迪比利,呢位法國小將曾經同高普係多蒙特共事過,所以高普都叫做擁有呢位法國小將嘅說明書。迪比利加盟咗巴塞隆拿之後,一直得唔到穩定嘅上陣機會,除左佢因為受傷三個幾月而缺席之外,古天奴嘅加盟亦另佢上陣時間被進一步壓縮。同時,佢傷癒之後踢出嘅表現並無達到多蒙特當時嘅水平,今季迪比利上陣17場西甲比賽只係成功射入3球,而佢對自己表現亦都開始慢慢失去信心。當初巴塞從多蒙特引入迪比利花費超過1億2千萬,而現時巴塞只希望喺佢身上收返部份嘅轉會費。
高普喺今年既轉會窗無疑係得到更多既轉會資金去買人,當佢被問及有無興趣簽入迪比利既時候,高普就話啦:「如果佢會出現喺轉會市場上面,我就有興趣。」而有報章就指出巴塞方面希望以8700萬英鎊出售迪比利,小編認為利物浦未必會出咁高既價錢去買一個無狀態既球員,雖然迪比利仍然只有21歲,但係由於太耐無出場,如果要佢搵返比賽狀態亦有可能需要比較長時間既訓練。反而,如果引入費基亞的話,轉會費一定比迪比利低,而佢亦會跟隨法國國家隊參加世界杯,狀態會有一定保障。只不過喺利物浦失落歐聯之後,佢又同傳媒講佢同利物浦嘅關係並唔係咁緊密喎。
再加上8700萬並唔係一筆細數目,高普需要補強既位置仲有門將,隨著卡利奧斯係歐聯決賽嘅表現,如果紅軍嘅高層決定換龍門,市場上嘅選擇其實都唔多。而利物浦想要買到頂級嘅守門員相信亦都需要用一筆巨額去收購,例如羅馬既艾利臣身價已經超過5000萬英鎊,而畢特蘭參與左世界杯之後身價應該會繼續上升,利物浦或者應該盡快同心儀既守門員簽約,而唔係等到球員身價水漲船高再被迫用高價買入球員。
總括黎講,高普肯定會喺今個轉會窗簽入多名球員,咁先可以確保到唔會再次出現後備無人可用嘅尷尬情況出現。

留言

會員
我要評論
請按此登錄後留言。未成為會員? 立即註冊
  • sflash1999
    sflash1999 於 31/05/2018 評論 NO. 1

    Dembele係16/17球季先加盟多蒙特 而高普係14/15球季後已經離開多仔...

  • Anfield Lee
    Anfield Lee 於 31/05/2018 評論 NO. 2

    呢位法國小將曾經同高普係多蒙特共事過,所以高普都叫做擁有呢位法國小將嘅說明書。

    做下功課先啦………飯唔係咁呃黎食既

快捷鍵:←
快捷鍵:→