【與車迷短訊】我們都愛古天奴

利永遠不會毒行 於 17/11/2016 發表 收藏文章
最近都無咩車迷消息,岩既,都無咩可以搵佢既理由。不過,因為一次機會,小妹又同到佢講野啦!今次呢就係車路士官網減價…


小妹:喂,車仔啲波衫減價喎…百幾蚊就有件上季既,抵都爛啦!

車迷:係喎,聽講利物浦呀阿仙奴呀都有減價,你打算買?

小妹:係呀,好想印古天奴。但成日都傳巴塞同皇馬對佢有意思,都唔知係真定假…
車迷:老老竇竇,我都幾欣賞古天奴。古天奴係最近既訪問都話對利物浦好有歸屬感,佢亦表示高普俾到信心佢,令到佢更加相信自己既潛質,繼而develop出一個想去贏波既心態(當然係正面)。而岩岩踢完國際賽,高普都洗左三萬鎊英鎊搵架私人飛機飛同佢費明奴返黎,(咁我地車仔同曼城呀PSG都有夾錢飛啲球員返英國),就係為左可以train多堂同埋唔好有jetlag既問題 。講到咁,唔會走卦…

小妹:我都唔知呀,大家都係做傳媒,呢啲訪問多數都係有哂稿讀。但巴塞對佢黎講應該都係吸引,又有佢friend子尼馬係果度…係國家隊見佢地都part得幾好,好驚佢有離心呀!

車迷:講呢啲,利物浦夠有費明奴陪佢囉。不過呢,古天奴係國家隊表現的確唔錯喎,上星期先對阿根庭射左球世界波,岩岩今朝對秘魯又有出色既表現,果下轉身靚到呢…去片!

呢球好明顯係信心同技術既表現,面對前面兩個防守既欄截仲可以即該諗到轉身(射個三波)再成功傳俾隊友,真係百看不厭呀!就連Xavi都讚佢係一個高汁球員,係高普既領導下仲更上一層樓,而利物浦要奪冠都好需要佢既在陣。

小妹:好想去秘魯馬丘比丘睇草泥馬呀!唉,之不過Xavi亦都話佢去巴塞既話 …巴塞會進步呢!
車迷:岩呀,所以而家個情況係1)高普幫緊古天奴,2)古天奴去幫巴塞。咁識諗既都會留係利物浦再提升自己水平先啦,而家係勁,但足球唔係一個人遊戲,相信係高普栽培下佢心理質素等等附加技能都會提升,高普出名係咩呀?唔買星返黎但自己去造一粒星出黎呀(多謝讀者提醒,呢句其實係小妹心入面諗既-唔似得某啲球會只係識用錢買星去砌隊明星足球隊);相反去到巴塞又要爭正選又要重新識應,好鬼煩架嘛。

小妹:你又好似講得岩…古天奴好識製造機會,過人成功率又高,有盤扭有直線,份人又冷靜唔貪功,最緊要係咩呀?岩踢高普高壓迫搶呀!呢啲咁熱血既進攻中場係邊度搵呀,仲要笑得好charm,真係可遇不可求呀!不過呢,係士氣同團結果方面,利物浦又真係做得唔錯既,所以今季應該有心留係度幫利物浦爭標,再遲啲就唔敢講啦。只不過呢,希望老細會加下佢人工啦!

車迷:雖然我地講就咁講,但係某程度上,球會都係好商業化,好價既話真係唔賣咩?當然啦,手持藍籌股好比手持午餐肉,keep佢耐啲會有升值既可能性。而係局外人,即係我咁睇,古天奴得果24歲,前途無可限量,要佢踢死一個球會…你估真係咁多個謝拉特咩?有緣既咪賣左都會再返黎,好似大衛雷斯咁…btw,你真係覺得古天奴charm?
小妹:不要再說了…話說今個星期六有曼聯對阿仙奴,聽講fanpiece會搞睇波party,一唔一齊join呀?

車迷:我聽日答你啦!


好…小妹等。


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Ferg
    Ferg 於 17/11/2016 評論 NO. 1

    車迷講好似啲人買星🌚

  • Nicholashk2009
    Nicholashk2009 於 17/11/2016 評論 NO. 2

    車迷講緊車?

  • Elvis Chan
    Elvis Chan 於 17/11/2016 評論 NO. 3

    車仔最後錢都唔肯出黎包機..肉酸

快捷鍵:←
快捷鍵:→