【繼續叫FSG老細】傳利物浦有意一月買下羅馬艾馬臣

利永遠不會毒行 於 27/10/2017 發表 收藏文章
之前有傳有中東財團透過Amanda Staveley對利物浦問價,但據阿聯酋傳媒報導, 利物浦老闆FSG已經拒絕咗杜拜投資財團嘅offer。

有指FSG認為利物浦仍然有升值嘅能力,包括電視轉播費,以及未來係社交媒體-Facebook以及Amazon嘅收費播放亦係一新市場。
已經係第三次代表不同財團去洽談利物浦嘅Amanda Staveley今次再度失敗。相信會專注係紐卡素股權買賣上。而利物浦大老細Thomas Werner就對利物浦迴聲報嘅訪問中,佢就咁樣回應(唔賣)傳聞:「我哋有好多比起擊退呢單謠言更重要嘅野做。」

FSG係2010年10月以£300m買下利物浦,至今仍然堅持成為利物浦最大股東,雖然,佢哋對於小部份嘅股份買賣持開放態度。有球迷就認為,FSG對利物浦係轉會市場嘅投資不足間接造成今日利物浦嘅局面,但高普隨即話係佢搵唔到心水中堅打得比現有球員好。

總之,利物浦老細將會繼續係FSG。

一月轉會市場,大家都諗緊高普會買咩人呢?
據意大利媒體Football Italia報導,高普準備係一月以 €25 m對羅馬左後衛,巴西藉,曾經幫巴西踢U17國家隊,但之後就轉踢意大利國家隊嘅23歲嘅艾馬臣問價。其實早係夏季轉會窗果陣,利物浦都有傳對艾馬臣有興趣,只係當時佢岩岩十字韌帶受傷傷癒,仲未回復狀態而放棄。
https://www.youtube.com/watch?v=YfzIfulIqFc
羅馬係2015年以£2m從巴西名牌球會山度士買返黎,係黎意甲前,佢被外借到當年仲係意甲球隊巴勒莫足球會,但亦因為球會降班而返回母會。如果今次交易成功,羅馬今次真係賺到一大筆錢。但係呢個時間唔好講錢唔錢住,呢個球員幫唔幫到利物浦?會唔會改善到後防問題呢?

艾馬臣有速度及技術,加上體能好好,又識玩腳法,的確可以打返生條左路。但留意返,睇下球皇片,佢同摩蘭奴都有同樣毛病,攻強守弱,掛住上前唔記得返後。如果改善下呢樣野,相信對利物浦都有幫助。如果唔係,講速度同體能摩蘭奴都有,佢出波都唔曳,咁我點解要艾馬臣買返黎先?
一月買球員最弊嘅野係無時間俾隊波夾,但係有同鄉巴西孖寶加上之前同前羅馬球員沙拿係隊友,相信要融入利物浦都唔難嘅。之不過現有嘅閘有摩蘭奴同買咗但極少出嘅羅拔臣,究竟再買艾馬臣返黎會唔會出?定幫佢轉位置踢呢?


source: this is Anfield , Express.co.uk, wikipedia

留言


請按此登錄後留言。未成為會員? 立即註冊
  • 聖卡西 於 27/10/2017 評論 NO. 1

    最緊要頂到波

快捷鍵:←
快捷鍵:→