【純討論】文尼應唔應該紅牌呢?

利永遠不會毒行 於 10/09/2017 發表 收藏文章
利物浦作客輸5球俾曼城,踢得唔好係真嘅,右路放題,小妹最愛嘅阿諾心理質素唔夠好,界外球都好猶豫。唉,後生仔經驗唔夠,加上中場零創造力等等,輸係…無可厚非。

而其中一個轉捩點,就係文尼喺上半場被判舉腳過高,傷害曼城門將艾達臣,紅牌直接出場。睇睇片先:
https://www.youtube.com/watch?v=KCybbWkZiWA

唔係輸唔起,裁判係比賽一部份,小妹係尊重球證嘅判決。不過只係想討論下,呢張紅牌應唔應該俾呢?係賽後,高普用「不幸」黎形容呢個判決以及個結果。

「我覺得唔應該俾紅牌,文尼根本見佢唔到。」

「今次絕對係一個意外,龍門同文尼都想要波,係呢個情況獲得一張紅牌真係唔好彩。」
曼城領隊哥迪奧拿喺訪問中亦講到文尼只係掛住望波,見唔到艾達臣;佢亦都唔係好確定應唔應該俾紅牌(I don't know if it was a red card)。

老老竇竇,喺落後緊嘅情況下得到呢個咁好嘅機會,一心想去波,文尼咁樣做係人之常情。加上喺禁區外,估計衰極咪黃牌,心急加上只顧望波嘅佢係大意,相信文尼呢刻一定好自責。而Melissa Reddy亦引述高普指文尼非常、非常、非常唔開心,亦做唔到啲咩令佢心情好返啲,佢對當時嘅判決表示驚訝。俗語有話重要的要說三遍,高普用左三次very very very,文尼應該好難過。
loading

亦有球迷留意喺賽後但高普伸手想同球證Jon Moss握手果陣被無視-事源係咁嘅,高普同助理球證Andy Halliday握手後,就伸手打算順勢同主球證Jon Moss握手,唔知係無心定有心啦,Jon Moss 無理到高普就繼續行入球員通道,而Andy Halliday見到呢個情況緊係同Jon Moss講啦!但食檸檬嘅高普就喺呢個時候收手,失望地離開。

今場球證Jon Moss,佢係2011年開始吹英超波,據英超官網資料,佢已經執法148場英超。Jon Moss曾被前球證Keith Hackett批評為2016年最差球證之一,係2016年4月,李斯特城對韋斯咸呢場具有爭議性嘅比賽(華迪嘅兩黃一紅被趕出場及係補時期間嘅一個十二碼判決),Jon Moss被指處理手法唔夠冷靜及加插個人情緒。

題外話,當年YouAreTheRef’s 網站亦有統計,Jon Moss係2015/16年果季嘅錯誤判決比其他頂級球證高-22場入面有13個誤判。換句話,即係每1.69場波,佢就會有一個誤判。(source:咁入呢度睇)

相信大家睇返playback,睇得出文尼係無動機去傷害曼城門將,再聽埋高普同哥迪奧拿講都應該覺得呢球波唔值紅牌,最多黃牌。但客觀睇,文尼舉腳過高係事實,有圖有真相,另外用腳踢到對方個頭已經蝕章;而艾達臣又真係擔架離場要換龍,雖然最後佢貼左塊大膠布好似無事咁出返黎睇波,但相信哥迪奧拿唔會蠢到係贏得一球果陣想換入巴禾卦…要拗嘅話最多勉強話個時機問題-舉腳先定頭頂先, 所以…要打得甩,相信機會都好微。(有錯請指出)
唉,停三場國內賽…而家最緊要俾文尼知道大家明白佢,叫佢唔洗自責;真係要樂觀啲睇嘅話,咪利物浦黎緊幾個星期都要踢歐聯,當專心留力踢歐聯囉…


source:
mirrormetro,skysports,goal.com


留言


請按此登錄後留言。未成為會員? 立即註冊
  • Kei Shun 於 10/09/2017 評論 NO. 1

    利申:今場撐鏝 ,不值直紅,但舉腳過高係危險動作,仲要踢中頭,食牌真係走唔甩!作為球證,如果用感情分睇佢有無心而比咩牌,咁已經唔公正。學高普說是不幸係最好解釋

  • faisiu 於 10/09/2017 評論 NO. 2

    應該要紅

  • Andy Man nok kwan 於 10/09/2017 評論 NO. 3

    其實個動作本身應該黄嘅,但係唔好采嘅係文尼踩中人地個頭,所以先比紅佢,如果係踩中其他部位應該都唔會紅

  • Leojai 於 10/09/2017 評論 NO. 4

    版主 其實踢心口已經紅牌嫁啦
    調返轉諗 如果mane掂波先 ederson 應該都紅得

  • peterben 於 10/09/2017 評論 NO. 5

    紅就紅硬,只可以話係不幸。睇唔到唔代表無犯規,而紅牌既要求亦唔會只睇係唔係蓄意。球證判決正確

  • Albert Lam 於 10/09/2017 評論 NO. 6

    其實佢個動作真係好危險。今次中頭對手無事真係好彩。當年施治比人踢頭,差d搞出人命。

  • OhMyGirl_Arin 於 10/09/2017 評論 NO. 7

    個個落到場都係睇波嫁啦 咁雙腳落鏟都係望住個波鏟嫁啦 唔通專登鏟斷人隻腳咩 佢個動作係危險嘅 拎紅都好合理

  • nigga 於 10/09/2017 評論 NO. 8

    屌你ederson 死番入去啦 出咩迎啫 俾你救到都抄芥攬兼penalty 啦

  • ALANBB 於 10/09/2017 評論 NO. 9

    我認為紅牌好合理,因爲2名球員高速去一個點爭波,而文尼起腳過高踢中龍門個頭係極之危險動作,隨時會死人,我甚至認為要追加停賽判罰

  • Frozen Leung 於 10/09/2017 評論 NO. 10

    相同動作如果係出自伊巴既話,又會話係'霸氣腳',係個龍門傻俾個頭伊巴踢⋯

  • KP23 於 10/09/2017 評論 NO. 11

    其實都係睇邊個掂到波先,如果係文尼先,艾達臣咪又係紅牌,加上危險動作,紅係走唔甩,講真,文尼有信心快過艾達臣所以咪出腳羅,點知人地出迎又快過你,7左拎紅非常正確

  • Hola Konichiwa 於 10/09/2017 評論 NO. 12

    鞋底是有釘的,插中眼會盲。冇心就直紅,有心就停賽一季并報警。

  • aczephyr 於 10/09/2017 評論 NO. 13

    慢鏡頭係文尼掂到波先

  • aczephyr 於 10/09/2017 評論 NO. 14

    大家可以參考:連一向出名仇利既加利仔都話呢球冇可能紅牌,佢更直言球證破壞了整場比賽

  • K.K. 於 10/09/2017 評論 NO. 15

    收皮啦咁都要開post,第一日睇波啊?

  • somewhere 於 10/09/2017 評論 NO. 16

    頭都未爆,俾咩紅牌

  • Siu LamBin 於 10/09/2017 評論 NO. 17

    點解重可以盲撐到咁。中左頭就係中左頭。已經5需要討論。調反轉文尼俾人撞低都紅啦。板主真係有睇波?

  • aczephyr 於 11/09/2017 評論 NO. 18

    連自己都承認勁憎利物浦既加利仔都話「冇理由俾紅牌」就已經說明一切啦。加上享利都話唔應該紅牌,就連曼城領隊哥迪奧拿都話文尼絕對冇心,更加話佢都唔敢講呢球係咪應該直紅出場。

  • OhMyGirl_Arin 於 11/09/2017 評論 NO. 19

    宜家紅牌個觀點根本唔係有無心咁簡單 雙腳鏟一樣係危險動作咪一樣直紅 好多時就算雙腳鏟中波都一樣直紅出場架啦 同埋其實艾達臣到位先過文尼囉 個個講到佢專登拎個頭比你踢咁 咁我都信文尼無心 但無心唔係唔洗拎紅嘅籍口lor

  • wombat 於 12/09/2017 評論 NO. 20

    利迷都係咁話,紅係合理嘅。 面對面即時望住個波,眼尾都一定稍到 龍門衝埋黎。 但文尼都算處理得好, 冇乜點爭拗, 事後亦都即刻 po文道歉

  • KolerH 於 15/09/2017 評論 NO. 21

    吾該作者吾識就吾好學人開post 啦!你睇下个龍門之后張相,聯左十幾針呀,紅牌已經基本,應該追加停賽十場八場

快捷鍵:←
快捷鍵:→