【等・高普的咖啡】又傳買德甲前鋒 !?

利永遠不會毒行 於 17/03/2017 發表 收藏文章
小妹身為偽文青,最近去左間café,叫左杯Latte。

話到明偽文青點識分邊隻咖啡豆好飲,
果香味定係可可味?可能最近心已太酸太累,所以揀左可可味。

拉花好靚,但係唔知點解,
望住杯咖啡,就會諗起等一個人;等一個人,就會諗起利物浦幾時買人。

頂,杯野凍晒。


利物浦領隊高普就好鐘意買德甲人,球迷一直希望高普傳說中嘅夏季收購「六人名單」可以加強防線。今次就有傳佢對萊比錫紅牛嘅Timo Werner有興趣。呢位德藉前鋒21歲,身高181cm,為球隊上陣23場德甲,總共入左14球波及6個助攻。

Werner 係上一季先以£10m 由而家乙組嘅史特加體育會轉會加盟萊比錫紅牛,亦係該球會歷年最貴嘅收購,而萊比錫紅牛亦都只係岩岩2016/17球季首次升上德甲。

德甲
Werner 6歲開始踢波,由細就係母會史特加(果陣仲係德甲未降班)受訓。有天份嘅佢好快入左球隊青年軍,更係2013年,17歲嘅佢更成為該隊最年輕球員去代表球隊出戰歐霸。當年嘅領隊Thomas Schneider形容佢係一個熱血、聰明同埋有速度嘅球員。除左呢一個紀錄之外,佢同時係年紀最細嘅球員去完成50場及100場德甲賽事紀錄保持者。

一般人都會覺得後生仔會忘本,Werner就話你聽其實90後都識感恩。雖然母隊降左班而佢又轉左會去另一隊升班馬,佢仍然表示自己係史特加嘅fans,但為左前途,希望得到球迷嘅體諒,同時希望史特加「一切都會順利」。

國際賽
Werner都有代表過德國踢國家隊。係2010年U15對波蘭果陣,第一次為國家隊上陣嘅佢大演帽子戲法,係往後U16及U19 嘅賽事,佢都有唔少入球。係2012年U17歐國盃決賽對荷蘭,當時完場1:1再互射12碼,Werner係第二輪果陣主射,入左。只可惜當年有一位隊友唔入,所以只得到亞軍。

2013年果陣,Werner 贏得德國足總頒發嘅U17最傑出年青球員金獎;而係兩年後,佢獲得U19最傑出年青球員銀獎。佢係U21國家隊當中更係主力,係外圍賽入左兩球,令德國U21國家隊成功打入2017歐國盃(6月開波)。

速度係球員其中一樣武器,Werner就被傳媒改左個花名叫做「Turbo Timo」,佢跑得真係好快架,跑100米只係需要11.1秒,真係同阿仙奴比利連有得揮。至於點解跑得快,佢就解釋係因為細細個會同老豆一齊跑山(毅行者啲朋友喎)。呢個前鋒亦可以擔當左翼鋒嘅職責,而有速度嘅佢係高壓迫搶中可以盡悄發揮。

Werner係萊比錫紅牛踢開4-2-2-2,要習慣高普嘅4-3-3都需要時間。雖然過佢大賽經驗唔少,但要適應英超都唔係易。同樣係德甲轉黎利物浦嘅後防球員卡拉雲提到,雖然英超同德甲嘅比賽都好激烈好緊湊,但至少係德甲你可以預計到對方點踢、用咩戰術。但英超就唔同,咩野事都有可能發生,球隊係踢法上變化好大。

之不過,就咁樣聽落唔錯呀,最緊要係名氣唔算太大,又後生,正所謂儒子可教,而且同高普又係同鄉…但其實利物浦前場都夠夠地人,係咪應該睇下防守果邊先呢?再且,外媒亦有傳同隊球員邊鋒Emil Forsberg同防中Naby Keïta亦係高普嘅wishing list入面…一次過買萊比錫紅牛三個人?又無咩可能…再算啦。


臨走果陣去左同老闆吹下水,發現原來佢係已經可以專心盃賽嘅轟,又轟,小妹真係酸到胃痛了。


reference: bundesliga

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→