【最好的歡送】摩蘭奴及史杜列治將於夏季離隊

利永遠不會毒行 於 05/06/2019 發表 收藏文章
利物浦官方網站於星期三出文感謝史杜列治及艾拔圖摩蘭奴對利物浦嘅貢獻,亦祝福二人前程錦繡。史杜列治同埋艾拔圖摩蘭奴將會喺合約結束後,即係六月尾離隊。
史杜列治於2013年1月由車路士轉投利物浦,於2018年1月外借西布朗半季,6年多嘅時間為利物浦上陣160次,總共有67球入波。而摩蘭奴2014年8月由西維爾加盟利物浦,呢5年為利物浦上陣141場波,個人亦有3個入球。

高普對利物浦官網就咁講:

「對住呢兩位出色嘅球員,我只想講“感謝”。」
「我擔任利物浦領隊一職時,呢兩位球員就已經係球隊入面。佢哋令到球隊團結起黎,向住一個正確嘅目標走。無呢兩位球員在陣,利物浦唔會有今時今日嘅成就。」
球迷一直都叫摩蘭奴做康樂組組長,只因佢為人風趣,成日係社交媒體度搞gag,為球隊帶黎歡樂。其實佢有速度,跑得快,佢有技術嘅,但防守就差咁啲(曾經有球迷建議佢應該打翼)由於後期踢法比較性感,眼神防守居多,其後因傷患,左閘位被米拿頂替,及後利物浦買入羅拔臣,佢就失去咗正選地位了。
「摩蘭奴嘅踢法同佢性格好似-好有生氣,好有力量,態度正面,願意為球隊付出。」

「我知係呢一季入面,佢比較少機會上陣踢比賽,但唔代表減低咗佢對球隊嘅付出。佢練波時非常認真,幫助整個團隊進步。」

「我相信喺不久嘅將來,摩蘭奴會再次入選西班牙國家隊。」
對於大師兄史杜列治,大家最鐘意一定係佢嘅入波舞。佢加盟頭幾年係佢黃金時期,但之後受傷患困擾,狀態下滑。其後高普將佢外借西布朗,希望佢可以有多啲上陣機會,個態快啲返黎。
今季歸隊後嘅佢後備上陣居多,雖然係咁,但季初英超對住車路士陣,86分鐘換佢入場果陣利物浦仲輸緊0:1,但佢於89分鐘入波,追和車仔1:1,令利物浦力保一分;而於大賽中,好似歐聯主場對psg,佢就喺30分鐘果陣入波,帶領球隊領先1:0(果場最終賽果利物浦贏3:2)。高普就覺得佢應該被認為係現今利物浦嘅其中一個最佳球員,佢陪伴球隊經歷過高潮以及低潮,同時亦為利物浦帶黎數個好重要嘅入波。
「史杜列治係我見過嘅球員中,其中一個finishing最好嘅前鋒。你認為無可能入到嘅波,佢就射入俾你睇。」

「今季入面,史杜列治亦係球隊擔當一個重要嘅角色。」
「隨住佢嘅離開,球隊可以失去咗一個更衣室領導人物。史杜列治係一個聰明,有自信嘅球員;當佢見到球隊有問題時,佢會灘講出黎同大家講。佢亦都好錫啲年輕球員,所以佢喺利物浦球員發展佔一席位。」
「無論點都好,我祝願兩位球員係未來嘅路上都會更成功。」
高普仲話,邊隊球隊簽到呢2名球員就係執到寶!雖然話就係咁講,但史杜列治同摩蘭奴永遠都會係利物浦呢個大家庭嘅一份子。利物浦嘅球隊同球迷一定會掛念佢哋,史杜列治同摩蘭奴以歐聯冠軍為利物浦嘅生涯畫上句號,應該係最好嘅farewell。

source: liverpoolfc,Daniel Sturridge Instagram, Alberto Moreno Instagram, Transfermarkt


留言


請按此登錄後留言。未成為會員? 立即註冊
  • kinfung 於 05/06/2019 評論 NO. 1

    「有速度,跑得快」?....

快捷鍵:←
快捷鍵:→