【放完暑假】利物浦球員為開季做足準備

利永遠不會毒行 於 09/08/2018 發表 收藏文章
英超星期五凌晨就開鑼啦,相信一班球迷都好期待,唔洗再餓波啦嘛~但利物浦嘅球迷就要等耐少少,星期日夜晚8點半,就會有利物浦2018/19球季,首仗主場迎戰韋斯咸。差唔多開季啦,利物浦球員都相繼歸隊練波啦~

不過英國天氣都唔係咁好,最近Melwood都落雨呀~不過無影響一眾球員嘅心情,個個練波果陣都笑晒口咁,又岩嘅,放咗咁耐暑假,而家見返晒啲同學仔,俾住小妹都開心啦!新舊球員相處融洽,呢個係必然嘅事,球場上講求默契,所以識朋友仔都係為開季做足準備,學黃子華話,「唔係咩?」唔講咁多,即刻睇相!
keita:Wheres sturridge?
自行加對白啦大家

而利物浦係開季前都踢咗9場熱身賽,賽果唔差架,贏7和1輸1!唔知係咪頭果啲比賽人腳仲咪齊整定試用青年軍因素多,利物浦七月中就和咗貝利,七月尾就輸咗俾多蒙特;不過最近四場利物浦個陣比較齊人,所以對住曼城﹑曼聯﹑拿玻里同埋拖連奴就連贏四場。

熱身賽姐,勝負無傷大雅嘅,最緊要係試岩個陣,大家都有返比賽果個節奏嘛。不過占士米拿就慘慘豬啦,喺對拿玻里果場就整傷個頭,聽講仲會有疤痕添,不過米拿一於少理,「boring milner」仲係igstory repost 球迷幫佢改圖為harry porter嘅poster自嘲添!佢更喺最近嘅操練中包住個頭上陣,不過小妹就覺得男人多條疤先叫型嘛,係咪先?
而可能係世界上最好嘅中堅﹑世界盃亞軍得主路夫蘭﹑殿軍軒達臣同埋阿諾都歸隊啦;而路夫蘭仲剃咗頭,新形象去見隊友。好朋友沙拿仲專登post張摸下佢個新頭嘅相添...不過路夫蘭之後係ig都反擊話俾沙拿聽,你知唔知落雨頭髮會長得快啲架!
但都有個球員未歸隊嘅,好似要預計要長抖(成季)嘅張伯倫咁,而家就同女朋友仔係希臘渡緊假,不過佢都帶埋球隊物理治療師一齊去,希望可以盡快重返球場。而利物浦傷兵名單上面仲有馬迪普﹑祖高美斯﹑卡拉雲同埋岩岩簽咗長約嘅青年軍Brewster。
咁轉會市場今晚就完啦,有傳高普愛將京斯將會離隊,利物浦叫價最少£20m,轉會至水晶宮或者修咸頓,有消息就話遲遲未done deal就因為價錢問題。估計佢走就走硬架啦,差在去邊姐,睇返佢傷癒後都好難喺利物浦爭到正選位置去踢,所以其實26歲嘅佢轉去其他球會踢正選都合理嘅。

有人走啦,咁會唔會利物浦再買人呢?skysports記者O'Connor就話利物浦唔會糾纏係費基亞呢個球員上,但高普亦有同記者朋友就話唔會講到咁死,抹殺轉會市場完結前嘅transfer。而O'Connor就話係行家嘅利物浦買人表上就仲有費基亞同埋多蒙特球員Pulisic,大家即管等多等,睇下高普會唔會俾驚喜球迷啦!


source:express.co.uk, Liverpoolechostandard.co.uk


留言


請按此登錄後留言。未成為會員? 立即註冊
    快捷鍵:←
    快捷鍵:→