【好掛住你呀】歐聯淘汰賽大軍有張伯倫個名呀! (附名單)

利永遠不會毒行 於 06/02/2019 發表 收藏文章
張伯倫強勢回歸!喺岩岩公開嘅歐聯淘汰賽大軍名單入面,有張伯倫個名呀!
張伯倫喺上季佔利物浦隊波一個重要席位,歐聯同英超都有波入。可惜嘅係,呢名英格蘭嘅中場上年4月歐聯四強對羅馬時膝頭韌帶受傷,經過10個月嘅治療後,張伯倫喺聖誕節終於可以重返球場...不過都係跑下步做一啲簡單嘅訓練,未可以跟操住,但佢康復進度良好,高普仲話佢有機會好得比預期快,2月尾就可以復操!
如果有follow開佢instagram嘅朋友可能都會知,其實呢10個月,張伯倫都好有決心要盡快返回球場-就算同女朋友去旅行,都要帶埋個物理治療師一齊,按時幫自己做療程。
雖然佢受傷係多咗時間陪女朋友參與唔同嘅event,好似最近喺巴黎舉辦嘅off-white catwalk show,但佢無玩創個心,日日返球會練體能(小妹見佢好多做gym嘅相)。
係呢度可以提一提各位,每一支球會都喺入咗淘汰賽後,可以幫3名之前未有報名嘅球員喺歐聯名單入面加名。而名單內最多可以有25名A隊成員,其中最少8名要係球會所屬國家嘅本土球員;而B隊嘅球員則無上限,但必要附合1)1997年1月1日後出世 同埋2) 15歲後,連續2年效力該球會。
而高普喺第一輪賽事,2月19日對拜仁幕尼克之前,就加咗張伯倫,已經歸隊嘅活特本以及荷蘭藉青年軍Hoever。前2個大家都比較熟悉,咁不如介紹下Hoever呢名17歲嘅後生仔啦,佢之前踢阿積士嘅。呢位00後嘅球員身高180,中堅同閘都踢得;而佢第一次係一隊亮相亦係上個月對狼隊嘅足總盃(路夫蘭開波5分鐘就拉傷果場)。
咁有加就一定有減,同樣去咗般尼茅夫,一個係借走嘅佳尼,另一個係賣走咗嘅蘇蘭基,就喺利物浦名單上剔走咗;而上次利物浦黎香港,大家見到嘅第3(定第4)嘅波蘭門將Grabara亦被借走咗,所以大家都唔會搵佢佢個名啦。

咁整理一下,利物浦現時嘅歐聯大軍名單有:

龍門:艾利臣,米奴列,Kelleher
後衛:雲迪克,路夫蘭,祖高美斯,馬迪普,阿歷山大阿諾,羅拔臣,摩蘭奴,Camacho, Hoever, Nathaniel Phillips,Johnston, Masterson
中場:法賓奴,基達,韋拿度姆,軒達臣,占士米拿,張伯倫,拉蘭拿, Curtis Jones , Pedro Chirivella
前鋒:沙拿,文尼,費明奴,沙基利,史杜列治,奧歷治,Brewster
睇返個list,其實入面都有啲球員都仲傷緊,但可能因為青年軍無限數目,所以擺埋落去先啦~


source: liverpoolechoLiverpoolFC,Ox-Chamberlain IG

留言


請按此登錄後留言。未成為會員? 立即註冊
    快捷鍵:←
    快捷鍵:→