【千呼萬喚】加歷查(笑):「雲迪克要減肥減返幾磅。」

利永遠不會毒行 於 28/12/2017 發表 收藏文章
雲迪克轉會費高達£75m,成為最高轉會費嘅防守球員。有人就驚係水貨,有人就話值;唔知大家點睇呢?題外話呀,雖然利物浦成日都簽修咸頓球員,但其實修咸頓都成日簽些路迪球員架-除咗雲迪克之外,仲有費沙科士打以及已經轉會熱刺嘅雲耶馬,留意返,係呢度些路迪都賺唔少架。
係2013年從荷蘭將雲迪克帶到蘇格蘭嘅前些路迪高級球探Neil McGuinness,對於利物浦以£75m簽下呢名中堅表示讚好。就認為雲迪克去到利物浦可以繼續有好嘅發揮。

睇返McGuinness 係BBC入面嘅訪問,佢將雲迪克同前曼聯球員里奧費迪南睇齊,形容佢係一個用波非常流暢嘅後衛。更有以下嘅點評:

1.制空能力非常強
2.加速同keep住高速pace既能力都勁
3.中堅黎講佢打左或者右都無問題
4.非常自在地後上幫下前場進攻
5.經常係場上說話(同隊友溝通),而佢亦好少犯錯。
同時,McGuinness又提到雲迪克嘅弱點係當球隊處於優勢時,佢嘅集中力就減低,相信高普一定會去改善呢個問題。唔緊要呀,利物浦典型問題,不嬲都要搞搞佢。

「曾經有人話佢當年荷蘭Groningen俾佢做正選係一個賭博性嘅決定,但我認識嘅教練都指出,睇到雲迪克嘅表現後,就知道佢係幾咁優秀。」

「而家機會黎啦雲迪克,如果佢可以維持佢嘅勤力以及成日想學習嘅態度,佢有極大機會成為一個頂級球員。」

「我認為佢係世界上頭十大最好嘅中堅,而我真心覺得佢去到利物浦會變得更好。」

McGuinness高度讚揚佢有超越預期的能力,而佢係利物浦將會穿著4號波衫,前隊長希比亞嘅號碼,唔知有無咩含意呢?
前利物浦中堅加歷查亦有俾意見,咁當然係讚啦,但亦提到佢要幫利物浦奪標去証明自己身價。

「世界足壇缺乏真正嘅頂級中堅,呢個解釋到點咁多球會想要佢,點解轉會費咁高。」

「大部人都認為呢個轉會費正常會出現係前鋒身上。」

「但其實轉會費就同表現成正比,如果佢踢得好,成件事咪值囉。即係好似15年前里奧費迪南咁,當年佢以£30 m加盟曼聯。但佢有回報喎-成為曼聯第一中堅,幫球隊拎冠軍以及留咗係曼聯十年。」

「呢個就係雲迪克要做嘅野。留係球隊,幫球隊爭標。」

「佢有身型,速度以及腳法,但對於領導能力就要觀望下啦。」

「佢係修咸頓上季嘅防守比利物浦嘅後防做得更好。」

對於有數隊球隊對雲迪克有興趣,加歷查就咁講,

「如果佢去曼城,佢將要爭先會有正選踢。但去利物浦,佢個名應該會係正選名單上面。」
加歷查都唔係剩係讚嘅, 話晒佢係2017年年頭受傷後缺陣五個多月,今季係修咸頓表現似乎未返到佢嘅全盛時期…

「睇返呢半季雲迪克嘅表現,佢要加緊練習,回復狀態啦。或者減肥減返幾磅先啦。」

加歷查亦俾問到雲迪克係咪比佢自己踢得更好,風趣嘅佢點答大家自己睇圖啦。

雖然話佢應該有正選打,但係未夾過無人知佢會唔會即刻同球隊磨合到。加上利物浦呢排都係採取輪換政策,高普應該會想睇多啲佢嘅表現先放佢係長期正選名單上。但係點都好啦,2018年1月1日佢就會成為利物浦球員,大家係暑假嗌咗咁耐嘅基達同雲迪克,高daddy 2018一次過俾晒你!

source: transfermarkt,
thisisanfield, skysports

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Cliff Chan Kuanfai
    Cliff Chan Kuanfai 於 28/12/2017 評論 NO. 1

    貴唔貴,見人見知。值唔值,睇晒呢季再评...除了双曼与车仔球迷,歡迎批评,虛心受教

  • wombat
    wombat 於 28/12/2017 評論 NO. 2

    淨返7.5 m唔知買唔買得番個 好啲嘅創造型中場

  • Daniel Cheong
    Daniel Cheong 於 28/12/2017 評論 NO. 3

    一陣出一二場就傷就搞笑

  • C Keung Lee
    C Keung Lee 於 28/12/2017 評論 NO. 4

    著得4號,希望佢好似大佬希咁成功

  • Lala Cheung
    Lala Cheung 於 28/12/2017 評論 NO. 5

    身體素質一流,希望清晒啲禁區入面嘅混亂比人執雞嘅波就好了。 如果再有死球入波咁就真係貴啲都抵。

  • Lennon Au
    Lennon Au 於 28/12/2017 評論 NO. 6

  • Nicky Mak
    Nicky Mak 於 29/12/2017 評論 NO. 7

    只怕近墨者黑,或者雙拳難敵4手

  • Drew Lee
    Drew Lee 於 29/12/2017 評論 NO. 8

    買埋個龍就齊腳

快捷鍵:←
快捷鍵:→