【不分化】被加利仔指年內會離隊 沙拿高呼我愛紅軍 (附:對VAR睇法)

利永遠不會毒行 於 21/08/2019 發表 收藏文章
而家好流行講要fact check,未fact check就唔好亂咁講,睇黎曼聯名宿加利尼維利真係要同香港人學下野啦...
加利仔於上星期嘅Monday Night Football就發表咗以下言論:

「我睇得出,沙拿將會於12個月內離開利物浦。」

「(利物浦名宿)加歷查都知架,不過佢唔會講出黎咋嘛。」

「我睇得出,嗅得出,仲感受得到。」
今季係沙拿加盟利物浦第三個季度,自利物浦喺上季拎到歐聯冠軍後,唔知係咪覺得沙拿已經achievement unlock,所以有好多傳聞就指出,巴塞以及皇馬等世界級球會都對呢位埃及嘅前鋒都有興趣;更出高價希望羅致佢去其球隊。
就住最近曼聯名宿加利尼維利就表示利物浦球星沙拿應該係未來12個月內離開利物浦,轉投其他球隊,面對利仔嘅「預言」,沙拿就即時回覆CNN記者,指出自己邊度都唔去,佢喺利物浦市住好開心,佢好愛利物浦隊波;利迷愛佢﹑佢愛利迷。不過呢,佢就講到明佢唔鐘意VAR,足球本身就包含咗球證嘅判決﹑球員嘅野心。
「我認同VAR喺危險嘅狀況下可以保護球員。」

「但對於我黎講,我接受球證有時會有錯判,球員會犯錯;因為呢啲情況可以令到比賽更刺激。」

被問到VAR有咩好處嘅時候,沙拿就好誠實咁回答,
「咁咪俾多啲機會我射12碼囉…」
呢名27歲嘅Egyptian King就於3個球季共射入72球以及30個助攻,協助利物浦奪取歐聯冠軍,以及英超亞軍。沙拿對利物浦嘅重要程度應該大家應該有目共睹,而高普亦都即時回應,認為利物浦好幸運有呢位世界級球員嘅在陣(不過呢句係同時讚埋文尼同費明奴)。
沙拿同利物浦嘅合約於2023年就完結,但喺呢段時間內,利物浦如無意外都希望沙拿繼續留隊。


source:90min , CNN, Goal.com

留言


請按此登錄後留言。未成為會員? 立即註冊
    快捷鍵:←
    快捷鍵:→