【一跣腳成千古恨】謝拉特: 永遠唔會癒合到嘅傷口

利永遠不會毒行 於 08/03/2019 發表 收藏文章
謝拉特喺最近嘅訪問中重提2013/14年嘅英超,當年佢嘅一個失誤造成咗一個永遠都癒合唔到嘅傷口。數返5年前,即係2014年,謝拉特喺季尾對車路士果下跣腳,間接令到利物浦跣走咗個冠軍,最後果季利物浦以2分落後曼城而失落英超冠軍。
前利物浦隊長,現任格拉斯哥流浪領隊謝拉特就咁講:

「由我跣腳果刻就造成咗呢心理創傷,我唔肯定呢個傷口會否癒合,但我改變唔到歷史。」

「當時我面對一眾球員,有啲而家仲係好朋友,佢哋對我嘅支持就係一切。」

「作為一個利物浦支持者,最想見到利物浦能夠走到最後,成為冠軍。」

「雖然就算係咁,都彌補唔到我當時嘅遺憾,令到個傷口好返。」

唉,心病還需心藥醫呀,謝拉特喺利物浦贏過好多錦標,就係未贏過英超。

「我都好誠實咁話俾大家聽,2013/14年係一個big year,然而獎盃卻離我哋而去,我成日都會諗返對車路士場波,或者我唔應該落場踢,咁當時可以有不同嘅結局。」

「但我唔會諗太多令到自己癲咗咁。」

「不過如果只可揀贏一個比賽-英超或者歐聯,我諗我會揀歐聯。但唔代表我唔重視英超,呢個都係一個大獎。」
而高普帶領嘅利物浦而家喺英超排第二,落後曼城1分。對於利物浦嘅爭標路,謝拉特就咁講:

「我唔會去警告(warn)任何一個球員,因為咁樣會令球員感到受批評同恐慌。」

「球員記住唔好太著重球隊同曼城爭幾多分,總之唔好諗咁多啦。」

「我以利物浦前球員身份俾到球員意見係,唔好諗太多,享受比賽,相信自己就可以了。」

利物浦自英超成立以黎都未拎過冠軍,今季好似好大機會嬴到,梗係緊張啲啦!
「我估係利物浦更衣室入面,球員可以利用自己嘅經驗去調整心態。佢哋有一位好好嘅領隊高普,我敢肯定,佢會有辦法減輕球員嘅心理負擔!」

「係而家呢個爭標過程中,球迷嘅角色都好重要,做得球迷,就一定會想球隊攞多啲冠軍。球員唔應該將球迷呢種渴望當做束縛,反而應該轉化為一種支持嘅力量。」

謝拉特指如果外界認為利物浦拎唔到英超冠軍就等於失敗,係對利物浦唔公平。

「對於我黎講,作為一個利物浦球迷,高普帶領球隊行咗一大步,佢已經歇盡所能去令球隊進步。」

之不過問題係,利物浦呢幾場真係踢得唔好嘛, 睇返利物浦3月份英超賽事有:
10Mar 主 般尼
17Mar 客 富咸
31Mar 主 熱刺

另外下星期仲有歐聯作客對拜仁嘅賽事...,爭氣啦!亦希望利物浦球員可以成功爭標,希望可以令師兄謝拉特個遺憾縮細小小啦,話晒又係曼城...有陰影架嘛。


SOURCE: ESPN, SKYSPORTS

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • 白雪情天
    白雪情天 於 10/03/2019 評論 NO. 1

    算啦, 佢唔滑到, 俾丹巴爆開, 咪仲樣衰。。。

    同埋, 果場波係輸羅渣士, 明明祗要唔輸, 就好有優勢奪冠, 偏要去狂攻, 唔知為乜

快捷鍵:←
快捷鍵:→