非龍非虎的龍虎切:路夫斯捷克

黃足坑 於 10/09/2020 發表 收藏文章
路夫斯捷克,24歲,英格蘭人,車路士青訓產品。早喺14/15球季,佢已經有為車路士一隊喺英超上陣,因為身高同良好嘅盤球技術,當時被譽為藍軍同英格蘭未來之星。因為潛力甚高,加上譯音相似,更被香港球迷冠以「龍虎切」稱號。2019年五月,當時沙利帶領嘅車路士,喺英超完結後同美國嘅新英倫革命友賽,諾夫斯捷克喺嗰場比賽受重傷,無法出戰接下來嘅歐霸決賽之餘,亦要長抖八個月。最終更要到今年六月先再次著起藍色戰衣。

經過如此大傷,加上佢本來已經受背傷困擾,路夫斯捷克喺復賽後表現大不如前,然而路夫斯捷克經常以後備身份入替,球迷即使知道佢踢得差,加上剛傷癒,都比較包容,期待佢新球季可以交出水準。但係喺車仔對白禮頓嘅友賽後,路夫斯捷克可能又一次令球迷失望。

喺多名球會要隔離防疫下,藍軍可用嘅一隊成員唔多,只有12個係上年一隊成員,加上薛耶治同添姆雲拿,車仔只有14個常規球員,其他都係未上位嘅青訓同外借大軍嘅成員。路夫斯捷克係14個入面其中一位,同奧杜爾一樣上陣72分鐘,同為上陣時間最多嘅藍軍球員。後者經過重傷同武漢肺炎後,睇得出活力同鬥心仍在,然而,路夫斯捷克就踢到患得患失。

路夫斯捷克喺該場比賽出任攻中,但係跑動範圍好少,比賽所見,企前佢一格嘅雲拿經常回後攞波,又不時喺兩側游走。相反路夫斯捷克經常企喺中間,搵位攞波亦都唔多。頭先講到路夫斯捷克以前擅長盤扭,但今場比賽好少見到佢扭波,用身材優勢推波上前亦失敗居多。
https://i.imgur.com/HFuYhk7.gif

有時路夫斯捷克甚至唔敢帶波推進,反而係同隊友駁腳。交完波後亦冇前插協助進攻。同上季踢開呢個位嘅蒙特有好大分別。進攻足球好興Pass and Move,要求球員傳完波後要走位,以拉開對方防守球員,作為攻中,路夫斯捷克反而冇做到。
https://i.imgur.com/EpKZzEc.gif

呢場比賽入面,間中都見到路夫斯捷克有應有表現,好似呢下咁樣,策動完反擊都肯跟埋上去,值得俾返個Credit佢。不過呢啲其實係進攻球員基本要做嘅,成個動作亦唔係特別搶眼。
https://i.imgur.com/udqqGwb.gif

我覺得路夫斯捷克問題之一在於佢失去膽色,又好似呢下咁,路夫斯捷克做曬Shoulder Check,知道自己後面冇黃衫球員,大可以殺入禁區,但最後都係冇殺入去,反而回傳再做,我認為同佢受傷後過份錫身,唔敢有太多衝撞有關。上面第一條片睇得出路夫斯捷克有意識幾時要帶波上前,但次次都係被撞開,亦可以理降為路夫斯捷克唔敢同對方埋身,食唔到身位就算數。
https://i.imgur.com/mAp4ynb.gif

喺錫身同跑動少兩大問題下,路夫斯捷克好難交出好表現,下半場有份出場嘅小將Conor Gallagher,相比之下更勤力同搏命,我認為路夫斯捷克呢場嘅表現甚至比唔想呢位預計被借走嘅青訓。今季車仔有夏維斯同薛耶治加盟,兩者都可以勝任攻中位置。加上本來嘅蒙特,高華錫,巴克利,甚至基摩,車路士喺呢個中場位置大有人在,就算翼位,藍軍亦有幾個選擇。如果路夫斯捷克無法回到當年勇,恐怕佢出場機會大大降低,長遠甚至有被清走嘅風險。

標籤: 車路士  路夫斯捷克  英超  白禮頓  

留言


請按此登錄後留言。未成為會員? 立即註冊
    快捷鍵:←
    快捷鍵:→