貴為藍獅班主,卻沒法入場睇波:艾巴莫域治

黃足坑 於 30/08/2020 發表 收藏文章
現今足球以金錢掛帥已經係不爭事實。尤其是英超呢個世界頂級聯賽之一,當然充滿銅臭味,甚至吸引英國以外好多投資者同豪門。最近,紐卡素亦傳出被沙特皇室收購嘅新聞,但最終因政治同電視轉播等因素,交易告吹。現時,只有五支英超球隊係由英國富商持有大多數服份。大部分球隊係由外國人「揸莊」。當中表表者不得不提車路士班主,油王艾巴莫域治(Roman Abramovich)。

油王喺2003年入主車仔後,將藍獅由中上游球隊搖身一變,成為英超富豪。入主冇耐簽入杜奧巴,A高爾,以及同摩連奴一齊過嚟嘅葡國幫。短短兩年就以95分,成為當時最高分英超冠軍,紀錄去到2017/18球季先被曼城打破。去到11/12球季,車仔更奪得歐聯冠軍,完成油王收購車仔時嘅願望。一路走來,艾巴莫域治經常到車仔主場史丹福橋睇波,當時睇親車仔主場比賽,鏡頭都會捕捉佢睇波一面,可見佢十分愛錫呢隊一手育成嘅戰車。

時間轉眼跳到2018年,英國政府給予油王嘅簽證到期後,再冇為油王續期。據指原因係認為艾巴莫域治同俄羅斯關係密切,可能係俄羅斯喺英國嘅間諜。的確,有好多新聞同消息都話油王同俄羅斯已故前總統葉利欽,以及現任總統普京關係親近。曾經喺俄羅斯有官職在身。筆者唔熟俄羅斯政治,唔清楚佢只係普通商人抑或另有政治目的,所以都係唔好多言。但自疫情之後,我哋發掘到艾巴莫域治喺車仔同其他生意以外,為英國所做嘅好事。

喺年中,英國疫情最嚴重之時,車路士係第一支球隊為英國醫護提供實際援助。藍軍將佢哋所擁有,喺史丹福橋球場旁邊嘅Millennium Hotel免費借俾西北倫敦嘅醫護人員使用,解決醫護人員因舟車勞頓帶嚟嘅不便,期間所有支出由艾巴莫域治負責。此外,車路士亦將附近車位借俾醫護人員。同時為佢哋提供免費食物,直頭協助曬醫護人員喺衣食住行各方面煩惱。原來史丹福橋係非常接近倫敦兩間主要醫院,所以車仔呢個做法對醫護有好大幫助。

呢件事雖然唔可以證明油王唔係俄國間諜,但我覺得佢唔係只視英國為賺錢之地,反而為西倫敦做足社會責任。自未能獲發簽證之後,外界認為車仔會車路士會喺轉會市場「縮皮」,唔計上年被禁轉會,佢哋今個轉會窗動作多多,看來油王唔會因此放棄車仔。最後,作為車迷,希望他朝一日可以見到油王重返史丹福橋啦 !

留言


請按此登錄後留言。未成為會員? 立即註冊
    快捷鍵:←
    快捷鍵:→