英冠寶馬跑不到終點,前線三子或去或留?

黃足坑 於 17/08/2020 發表 收藏文章
英冠賽季曲終人散,本來深得球迷期待,前線擁有BMW三子嘅賓福特,由於最後兩場聯賽分別輸俾史篤城同班士利,痛失直接升班資格,最後連附加賽都不敵富咸,升班夢碎。
賓福特管理層一向願意賣人,只要英超各路人馬開得出好價錢,三子離隊他投機會都幾高。所以今次就同大家簡單介紹下佢哋幾位。

1.賓拉馬 (Saïd Benrahma, 25歲)

阿B有英冠尼馬之稱,一聽就知佢係擅扭之人,英冠賽場唔難見到佢使出打機先出現嘅招式。佢可以扭過一兩個後再傳俾隊友,呢招亦令佢以8個助攻成為隊內助攻王。另外場均搏到1.4個犯規,數據睇嚟要守住佢都十分困難。問題係英冠水平始終唔高,防守佢嘅後衛質素有限。附加賽決賽對富咸一役,對住有英超經驗嘅Odoi,賓拉馬都難以扭過對手,反而造出過多動作拖慢進攻。不過賓拉馬仍然吸引包括車路士在內嘅潛在買家,筆者期待佢喺頂級聯賽能夠話過就過。

2.麥比奧姆 (Bryan Mbeumo, 21歲)

阿M係三位年紀最輕,但佢嘅入波+助攻次數係三位最多,場均0.67次入波/助攻。佢亦曾代表法國U21出戰。麥比奧姆係典型左腳踢右邊嘅球員,擅長喺禁區頂燙射。佢亦經常喺禁區內搵到位置交場入波/助攻。即使年紀輕,數據好。我認為麥比奧姆呢種踢法大有人在,英超球象未必會花大錢簽下呢位法國小將,暫時亦較少佢嘅轉會消息。

3.屈堅斯 (Ollie Watkins, 24歲)

阿W係隊中射手,司職中鋒,今季英冠入26球,同富咸前鋒米杜域並列神射手。我會形容屈堅斯係窮人版華迪:傳統英國中鋒,大家都係身形唔算高大,但頭頂腳踢乜都有啲,踢法亦比較簡單。三人之中我最睇好佢嘅前境,因為佢嘅踢法適合大部份英超中下游球隊。暫時維拉對佢興趣最大,希望佢可以代替韋斯利攻堅。前季英冠入球如麻嘅Pukki同Abraham都喺首季英超取得雙位數字入球。如果屈堅斯喺英超有足夠上陣機會,我相信佢表現都係相當好。

無論出年去到邊度,希望三子可以繼續踢好波俾我哋睇啦!

標籤: 英冠  BMW  賓福特  

留言


請按此登錄後留言。未成為會員? 立即註冊
    快捷鍵:←
    快捷鍵:→