永遠追隨抑或暫時避席:疫情下死忠球迷的抉擇

黃足坑 於 22/08/2020 發表 收藏文章
事先講明,呢篇文唔係要批鬥人,只係想同大家了解下球迷嘅心情。

受武漢肺炎影響,各地賽事大多以閉門形式進行。除咗令球隊失去門票收入同主場氣氛外,各隊球迷都深受影響。喺無法入場之下,有人選擇安坐家中睇波;亦有人會用自己方法到現場為愛隊打氣。就連香港呢個睇波氣氛冇咁狂熱嘅地方,都有人隔山睇波。凡事都有兩面。有人話佢哋好支持愛隊,夠晒熱血,但更多人覺得疫情之下仍然堅持聚集,實在難以接受。香港班球迷大部份都有戴口罩,尚算講得過,但去到歐洲,佢哋防疫意識較亞洲人差,去到如此情緒高漲之時,戴口罩嘅人更少。

就好似利物浦奪冠當日,睇波嗰陣已經聽到場外有人放煙花,就知多人聚集啦。即使紅軍官方建議球迷唔好出嚟慶祝。球迷之間一於少理。數以千計利迷喺場外等待捧盃,但大部份人冇戴口罩,令人擔心。至於網上反應有正有反,有啲認為利記終於嬴得英超,出嚟興祝可以理解;亦有唔少人覺得留喺屋企興祝先係最好選擇。

據我觀察,大部份球會,無論係真心想提醒球迷注意安全,定係出於社會責任,都有呼籲粉絲暫時唔好外出睇波。但好多球迷組織都冇理會,決定球隊喺邊度踢波都去支持,好似葡超波圖球迷咁樣,一班球迷甚至爬上球場頂部觀戰,唔理危險同病毒傳染嘅風險。只可以講,佢哋真係好__鍾意波圖。
loading

而到最近,巴黎聖日耳門嘅球迷組織就話,因為疫情關係,佢哋唔會喺四強比賽時聚集球迷。成位少數選擇暫時避疫嘅球迷組織。通常呢啲球迷組織發起人都支持球隊好耐,眼見愛隊將會踢歷史以嚟最重要嘅比賽之一,要同佢哋暫時分隔,呢個決定相當困難。外國網上都普遍讚同佢哋做法,亦可能會成為其他球迷組織嘅榜樣。新球季好快又到,而疫情似乎未有咁快離去。唯有希望大家留喺屋企,健健康康咁睇波啦。

留言


請按此登錄後留言。未成為會員? 立即註冊
    快捷鍵:←
    快捷鍵:→