李城不可或缺的核心：占士麥迪臣 精選

如果要講李斯特城季尾失四原因，一定要數到“十號仔” 占士麥迪臣嘅受傷。呢位進攻核心自七月一對愛華頓嘅比賽後，六場比賽只得兩勝一和三負，可見麥迪臣缺陣對李城影響之大。到底麥迪臣喺“狐狸"嘅角色係咩呢？


戰術位置
李城喺麥迪臣在陣下，主要擺出4-3-3嘅陣式。三人中場分別係尼迪迪，泰利文斯同麥迪臣。尼迪迪會留喺中場較後位置，主要負責搶波等防務；泰利文斯憑住出色體能，擔當Box to Box中場嘅角色，助攻助守。至於麥迪臣係三名中場參與進攻最多嘅一個，係李城嘅進攻策劃者(Playmaker)。三位中場視乎情況同對手，會以唔同企位出戰，形成4-1-4-1，4-2-3-1同4-3-3等陣式。進攻嗰陣，麥迪臣主要企喺前鋒同兩翼之後，有波在腳時就會傳比三箭頭其中一位，再視乎情況射波或橫傳俾位置更好嘅隊友。麥迪臣全季交出84次關鍵傳送，比隊內第二多嘅泰利文斯(52次)多超過一半，場均創造射門次數達5.76次，聯賽入面只有迪布尼同馬列斯多過佢，可見佢喺中前場策劃進攻嘅能力。

死球處理
今季李城大部份角球，罰球，都係又麥迪臣主理。而佢處理死球亦的確有一手。先講傳波，佢傳去近柱遠柱會有唔同力度，有時會係急勁平飛波，亦有時係高波，而佢兩種死球方法都相當有威脅；至於罰球直射都只可以話唔差，今季聯賽佢雖然只有一球係罰球直入，但每次射親都似模似樣，可能今季罰球冇乜運。至於上季就有四球罰球入波。
https://i.imgur.com/ufqp5QK.gif
傳球能力
麥迪臣同時有一手獨特嘅腳面傳波技巧。令佢傳波角度更大，對手亦更難預計佢傳波嘅路線。就好似對錫菲聯呢球助攻比華迪咁，麥迪臣就算用左腳都未必可以傳到呢個位，就係靠腳面先可以交出助攻。即使係順腳嘅傳波，麥迪臣經常搵到遠距離嘅目標，直接供應俾李城攻擊幾個點。麥迪臣受傷後，李城變咗要更依賴兩邊上前助攻，進攻模式少咗一範。
https://i.imgur.com/zqz42sK.gif
射門能力
連同頭先提到嘅一個罰球直入，今季麥迪臣總共射入六球，當中四球係嚟自禁區外，如果睇埋佢今季所有射門位置，大部份都係喺禁區出面，大約20至30碼範圍。可見麥迪臣係習慣，而且擅於遠射，遠射入波次數亦比位置相近嘅般奴(3球)同蒙特(1球)多，而且後兩者感覺企得更前同有更大射門權。可見遠射亦都係麥迪臣嘅殺著。

總結
作為李城十號，麥迪臣絕對係襯得起呢個號碼，無論係交出直線，關鍵傳送定係射波，佢嘅表現都係喺英超前列水平。麥迪臣今季只係有六入球三助攻，其實數據睇嚟唔太突出，但係睇真啲就會發覺佢更多係交出助攻前一下嘅傳送，經常負責將個波送入對方防守重地。希望呢篇文可以幫佢平反。