「傳曼聯」最新成員:列基朗

黃足坑 於 13/09/2020 發表 收藏文章
每年轉會窗,曼聯都會同好多球員拉上關係,當然只有部份球員最終成魔。今年就有辛祖同雲達碧克。前者同曼聯無疾而終,至於後者已經染紅。而最近同曼聯拉上關係嘅,就係西班牙新晉左閘,上季由皇馬外借到西維爾嘅列基朗(Sergio Reguilón)。我認為呢位歐霸冠軍成員,正正係曼聯需要嘅一員。

曼聯上季中尾段開始搵到贏波方程式,尤其喺英超復賽後有好好嘅成績。但係佢哋兩閘方面有唔少改善空間。右閘雲比沙卡係較好一員,雖然守多於攻,但係一季走來,的確見到佢嘅傳中進步不少。至於左閘位置係曼聯較差一環:梳爾自從嚴重受傷後,上前助攻次數減少,同時經常受傷患影響,唔可以期望佢場場披甲。而班頓威廉斯雖然有潛力,但級數未足,尤其對住實力相若嘅球隊時,班頓威廉斯係被重點攻擊嘅一邊。上季曼聯進攻套路比較單一,主要由般奴同普巴俾波前面三位球員追,間中亦有雲比沙卡上到嚟傳中,左邊則更加少。所以如果曼聯簽到一個好嘅左閘,對攻同守都有幫助。

列基朗上季喺西維爾收獲5個助攻,全隊排第三,只係比班尼加同拿華斯少。加上佢錄得三個入波,足以證明佢嘅助攻能力。再仔細睇,列古龍上季有41次成功過人,103次傳中,41次關鍵傳送,喺西班牙對鳥克蘭一戰中,初次上陣嘅佢亦有7次傳中同4次關鍵傳送,同曼聯梳爾比較下,梳爾有24次成功過人,37次傳中同20次關鍵傳送,數據同列基朗差太遠,雖然上陣時間梳爾較少,但計場均數據都係前者優勝。
以下分別係列基朗同梳爾嘅heat map,可以清楚見到前者參與進攻次數更多。

列基朗喺進攻時常有無球走位,而且無論Underlap定係Overlap,列基朗都做到,因此可以同唔同踢法左翼配合,左路攻勢亦更加多變。不過假設曼聯左翼仍然係經常內切嘅拉舒福特,單純要列基朗留喺最左邊,做Overlap都冇問題。
https://i.imgur.com/JOXV3NR.gif

正如頭先提到,列基朗好多傳中,而對烏克蘭一戰睇到佢無論傳地波定高波都可以應付。
https://i.imgur.com/h2yCFVA.gif

加上此子射門能力不俗。雖然閘位球員射門機會唔多,但呢個始終都係Bonus嚟,對華倫西亞射入嘅一球甚至係用非慣用腳射入。
https://i.imgur.com/n1SGmEv.gif

防守方面,列基朗數據唔算突出,場均交出1.18次攔截,比梳爾嘅1.24次略少,兩位球員都超過四成,列基朗場均截波次數1.36次,梳爾則有1.14次。總括而言,兩者防守數據差距唔大。

最後講下轉會費,今年左閘交易唔少,車路士同曼城都有喺呢方面補強,分別買咗捷維爾同艾基,據報兩人轉會費都超過四千萬鎊。暫時皇馬為列基朗開出約三千萬鎊轉會費,相比前兩者,可以預計列基朗轉會費亦唔係太高。

我認為列基朗去到曼聯嘅話,除咗令曼聯對弱隊時,喺左路增加一個進攻點外,亦可以令蘇斯克查思考三中堅嘅可行性。喺西維爾主帥盧柏迪古下,中場班尼加經常墜後,接近同中堅平排,從而喺進攻時解放左右兩閘上前,因此以佢上前頻率睇嚟,佢絕對可以勝任左翼衛一職。再大膽一諗,將梳爾放喺三中堅嘅左中堅位置,參考阿仙奴同車路士使用泰亞尼同艾斯派古達嘅方法,都有得諗。所以,各位曼迷不妨期待下呢單交易,佢可能係曼聯一路奇兵。

標籤: 西維爾  曼聯  

留言


請按此登錄後留言。未成為會員? 立即註冊
    快捷鍵:←
    快捷鍵:→