香港球證水平:係咪真係體能嘅問題?

吹哨者 於 25/03/2021 發表 收藏文章
閱畢施建章君喺友台嘅文章,佢提及好多近年嘅香港國際球證嘅水準都大不如前。鍵人反思:究竟係咪真係呢班球證嘅問題呢?

自鳳凰計劃開始,香港足總嘅裁判部增加左裁判導師同埋考核員嘅人數,以確保有足夠嘅專門人手觀察初級球證,確立比以往公平嘅晉升制度,故此近年來嘅香港國際球證都喺較年輕嘅歲數就獲得國際提名,同時佢地有更多時間可以考獲更高級嘅資格(例如亞洲足協精英球證)。除此以外,決定球證有冇得晉升,仲要睇裁判活動出席率,以及每年兩次嘅體能測驗
早幾日發生嘅港超性騷擾/性別歧視事件裡面,曾有肇事者稱女球證唔應該再執法男子賽事,但事實係,羅碧芝可以執法港超,就代表佢通過左男子要求嘅體能測試,體能測試要求可參考香港足球總會官網


近年嘅球證體能測試已經改左兩次制,現時嘅15-20 interval 同埋早幾年嘅 30-40 interval 都好考球證嘅起步能力,比起再之前嘅均速跑體能要求更高(鍵人亦只合格兩次),目的當然係希望球證可以追到今時今日愈嚟愈快嘅比賽速度。去到呢度,問題嚟啦,喺體能測試淘汰甚至趕走咁多球證,會唔會導致球證專注跑步,而忽略研究球例同埋執法技巧?

記得疫情前,PGMOL同香港足總裁判部交流頻繁,互相交換球證執法,英超女旁證馬斯亦登陸旺角場。足總可唔可以仿傚英格蘭球證制度,取消或降低部分初級球證嘅體能要求?英格蘭嘅球證制度將球證分成Level 1 至Level 7,成年嘅球證會由Level 7 做起,累積相應嘅執法經驗,並且通過考核,就可以升級,升上Level 6 (郡級球證) 同Level 5 (高級郡級球證) 都唔需要考體能。即使升上更高嘅Level 4,都只係要求12分鐘跑2600米同埋兩次7.5秒完成嘅50米衝刺跑。

誠然,香港足球人口比英格蘭少,球證嘅需求都相對較少,但係咪需要用體能測試令咁多球證消失於球證界呢?如果大家有細心留意第三段嘅香港足總體能要求,應該唔難發現二等、三等及新球證嘅體能要求係一樣嘅,而二等球證可以執法港超,新球證就主要喺丙組或青年聯賽執法。鍵人唔係足球或者體能運動專家,但同一個體能標準係咪真係適合所有球證呢?即使近年新增暫準球證制度,每年受惠嘅人數又有幾多?

的確,球證需要體能去貼近比賽,獲取最佳角度,但鍵人相信,喺大球場執法同喺摩士公園二號場執法嘅體能要求截然不同。

鍵人已經甚少執法,但願香港球證可為香港足球帶來更多。
標籤: 羅碧芝  球證  港超  體能  香港足球總會  

留言


請按此登錄後留言。未成為會員? 立即註冊
    快捷鍵:←
    快捷鍵:→