【陋室雜談:回味七號美酒,曼迷淺嘗足矣】

足字室 於 27/05/2019 發表 收藏文章
文:蘭斯貝利

昨天曼聯元老隊對拜仁元老隊,大勝5-0。當中,一定要提起佢 - 碧咸。好多曼聯球迷話,感覺番晒嚟。

有室友說,曼聯七號不一定是最好波的一個,但戰意心態一定要是最好的。我唔熟曼聯,但講起佢地七號仔,一定知。

愛上曼聯的您,因為以下的他們吧?
白賴仁笠臣做得好,而佐治貝斯及簡東拿好波當中更有星味,這就是傳奇。
而碧咸係令曼聯七號升華至一個無人能及的境界。咩境界?
商業搵錢的境界:靚仔、七旋斬、萬人迷。
我相信,經過尋晚果場曼聯元老對拜仁元老隊
來季曼聯新波衫,印七號盪碧咸個名肯肯定多過山齊士!

換個角度諗,C朗當年頂得住七號呢個重大壓力,
由一個成日盤扭插水的排骨仔成為體能超班的全能球王,
更顯得出佢心理質素之高。
因為,當呢支曼聯七號隨著歲月,細嘗下你會發現好多嘢已經唔同晒。奧雲,都叫做幫過曼聯拎英超,絕殺曼城果場,都足以令他成為紅魔名宿,但總有一股來自默西賽德郡土壤的味道,總是怪怪的;
華倫西亞,相信壓力太大,一季之後,沒有了。
迪馬利亞天使成魔,曾經成為七號波衫的主人,可惜,又係得一季貨仔。
不羈迪比,挾著荷蘭神射手之名駕臨奧脫福,可惜名大於實,甚至態度散漫,最後黯然離開。
至於神魔合一山齊士?佢啲鬥心去晒彈琴,曼聯真係被雲加擺了一道。
據統計,2018年1月山齊士加盟曼聯以來,人工加獎金已經超過3000萬鎊。
不過唔洗擔心,山齊士願意減人工下離開夢劇院!
佢都知自己在曼聯都無好日子過,球迷覺得佢人工高,隊友又眼紅佢,
所以放完假後會加操盡快提升狀態,聽講祖雲達斯同國際米蘭都有興趣,
回到意甲呢個成名地重新開始,咁咪幾好。

一直相信,任何組織,部門,「承傳」二字非常重要。
為何曼聯自費格遜走後成績下滑未能重回往昔光輝?
人,用錢買了普巴、馬迪爾、山齊士;領隊雲高爾不適合,換了摩連奴!最後全部令人失望,
活華特被球迷怒稱唔識波,固然係其中因素,但莫耶斯、雲高爾、摩連奴的足球哲學,其實與曼聯不太相襯。
或許高層明白承傳很重要,才找來蘇斯克查走馬上任,
起初一度不敗,但坐正後無以為繼,
對他來說,甜蜜期提早告終,來季自然是真正考驗的開始。
有人話,青訓普巴係承傳一部分,但筆者常覺得,普巴來曼聯,不是真心想為球隊好,他的行為態度更像一個大細路:

「當年你賣走我,最後咪要靠番我,我想點就點。我要做大佬!」


或者曼聯喺佢眼中只係玩具,奧脫福,只係佢嘅花園。
主人在自己花園,點解要跑?

所以散步居多囉。
曼聯仲話要留普巴,就靜待事態發展吧。

睇番碧咸入波係完美,但睇一陣就好。

回憶像甜美烈酒,一杯起兩杯止已經足矣,
如果只沉醉昔日美好,
一覺醒來,看到眼前百廢待興,更是唏噓。
人要捉緊現在,才能前進啊。


無論撐邊隊的球迷想分享、想用文字記得自己對球隊的點滴,歡迎嚟足字室!如喜歡我地的文章,請Follow我地的專欄,亦都可以關注我地Facebook Page,球壇最新動態盡在此!
最近仲有中堅賓親赴巴庫睇阿仙奴決賽,仲會大派手信,記得支持足字室!

如果喜歡我們的文章,請即分享到︰

標籤: 碧咸  英超  曼聯  回憶  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→