【足字室呈獻:十幾年女球迷我問佢答:曼城篇】

足字室 於 21/02/2016 發表 收藏文章
文:蘭斯貝利、魚拉突

下星期日晚,就係英格蘭聯賽盃決賽,利物浦決戰曼城!究竟邊一隊可以率先成功捧盃?
呢一個星期,都會係藍月亮的關鍵時刻,四條戰線究竟可以走得多遠?

足字室為左隆重其事,順便慶祝Like數多過689,我地搵左一個捧左十幾年曼城的女仔 - 阿Kay做左個深情訪問!

有圖有真相~
(蘭斯貝利:圖為Kay上季在英國Working Holiday時入場睇曼城對阿仙奴,可惜輸波呵呵呵,仲覺得唔清楚?睇落去啦!)

本專訪內容純屬女球迷之個人意見,與足字室立場無關

足:阿Kay你好呀!你鍾意曼城幾耐?點解會鍾意呢隊波?
K :我由2002年,大約中二啦(魚拉突:嗱幾多歲就自己計),曼城就剛剛升上英超~奇雲基瑾教緊果陣呢~第一年升上英超孫繼海就成功在曼城落班,我爸爸就因為難得有中國人踢英超,而經常睇曼城既賽事。咁佢順帶就拉埋我一齊睇,我睇下睇下,又覺得隊波好進取,幾熱血,就係咁愛上左曼城。其實果陣的曼城同而家李斯特風格好似架!

足:咁你又最鍾意邊個球星?
K :以前一開始最鐘意被譽為左翼天才的Adam Johnson,點知而家衰十一,但佢係我第一件印字的波衫;第二件係Kompany,11-12年,第三件係 Zebaleta,第四件係Silva ,佢真係好穩定,值得表揚呀!
而下季我就打算印奇雲迪布尼,靚仔嘛!(心心眼)
其實有好多曼城青訓我都有留意架,例如米卡里察士去左維拉都會關注下佢~

(曼城大富翁...究竟入面起D咩呢?)

足:講完最鍾意,你又最憎邊隊波?
K :仲洗問?緊係曼聯啦當然!因為同市既緣故,令自己好憎,又成日踢4424,Until We Score…
足:即刻諗起4:3果場…
K :係啦諗起都嬲呀!!!以前我細個d人聽我講鍾意曼城,佢地都以為聽錯,唉!(笑)

阿Kay仲試過專登走去曼聯主場…

(作為一個女仔,你都算係幾大膽。)

足:好彩你唔係舉中指咋...如果唔係張相點出街(笑),咁你試過為隊波做過d咩顛野?
K :一定係去現場睇波啦!2014年英國成為可以Working Holiday的國家,我就膽粗粗申請,最後仲得左,果陣節衣縮食都會每個月入主場睇一次波!我20歲就定下一個目標,要25歲前去主場睇波!我真係做得到!哈哈!雖然次次睇都輸多贏少…(喊出黎)

(第一次去主場,係威既)

足:咁你會唔會捱夜睇波?
K :未必啦。人大左!凌晨真係好少可起到身,除非係歐聯或者對英超強隊都會睇下!

足:咁你捧咁多年波,有咩最難忘moment?
K :有三件事!首先當然係阿古路絕殺QPR果下啦!本身上半場贏緊,已經Facebook開晒POST諗住拎硬架啦,點知下半場輸1-2,果陣真係坐左地下不斷喊…然後竟然見到可以反勝3:2!仲要嬴埋曼聯得失球!仲記得當時D球迷衝晒出去慶祝!贏到個聯賽冠軍真係好感動架!
(魚拉突:不要再說了…我果陣灰左3日…)

第二就係曼城黎香港,好興奮好興奮好興奮!
(蘭斯貝利:當年新聞有影到阿Kay上電視架哈哈)

仲有就係歐聯對拜仁果場分組賽反勝3:2!!我係主場睇,叫到失晒聲!
其中最令我感動就係D球迷落後既時候,都會大叫Come on City~Come on City,證明大家都好撐隊波!

足:曼城最近換帥,你有咩睇法?你地係唯一一隊有機會四冠,會唔會影響戰績?
(訪問當日,曼城主場被李斯特城打敗…)
K :其實我都覺得有d奇怪,因為咁樣令工程師都幾尷尬…至於今季展望,如果無傷患,歐聯過到16強已經好好!你知而家迪布尼傷左…8強就更好啦,然後就...都係唔好FF咁多!(蘭斯貝利:我都唔想繼續做十六弟呀!)事實上阿古路今年狀態一般、後防又無公司佬、中場耶耶又無咩心機踢,所以變數係比較大...
足總盃呢,如果嬴到車仔機會都大;聯賽盃緊係要贏啦!英超就...未來都對強隊,又多傷兵,比較難打囉~

足:網上有球迷想我幫手問,接唔接受到另一半唔識咩叫越位?同埋你接唔接受到另一半係曼聯球迷?
K :我一次過答晒啦!首先我男朋友都係球迷,同埋佢都係捧曼城架哈哈…(又心心眼)
足:識睇波講波的女朋友,這些機會不是屬於我的…

(薩巴列達同高拉洛夫...So Sweet!)

足:夠啦唔好放閃啦,有咩想同今次聯賽盃的對手講?
K :對利有咩講?有高普黎到,係好值得高興,因為佢有心又熱血!佢應該會令英超更有娛樂性!不過我對曼城仍然有信心!始終人腳上整體實力比較強,球員都好支持教練~柏歷堅尼下年走,球員都要為下年爭取首發而力戰利記嘛!(笑)

(Kay:放馬過來!)

足:最後,有乜說話想同我地足字室講呢?哈哈
K :你地繼續努力,寫多啲中立角度嘅文,寫多啲名氣唔大但好波的球員同細球會的野啦!
足:多謝阿Kay~~今集訪問時間差唔多,下集我地會訪問十幾年女利迷啦!多謝大家~


如喜歡足字室的朋友,可以訂閱足字室在Fanpiece的專欄,
仲可以在Facebook Like我們的專頁,
你們的每一個Like,也是對我們一個莫大的支持及鼓勵!

足字室Fan Page 傳送門



如果喜歡我們的文章,請即分享到︰

標籤: 曼城  球迷  女呀  

留言

會員
我要評論
請按此登錄後留言。未成為會員? 立即註冊
  • rickytct
    rickytct 於 21/02/2016 評論 NO. 1

    講開迪布尼,其實真係靚仔咩

  • Isas Chan
    Isas Chan 於 21/02/2016 評論 NO. 2

    基謹果陣我淨係諗到安歷卡前鋒黑洞

  • Why Wong
    Why Wong 於 21/02/2016 評論 NO. 3

    马刺女神

快捷鍵:←
快捷鍵:→