不專業足球週記 (二)

哈囉，我地又見面，呢個雖然話係週記，但既然我係隨心既就是旦喇，有時候好似今次咁未足七日就出一次，我諗大家都唔介意喇？
以前除夕同新年，本地波都會上演省港盃既戲碼，由香港同廣東各派出一個代表去爭奪呢項歷史悠久既賽事冠軍。以前香港最重視呢個盃賽既時候係會派港聯出戰，不過近年都係以年青球員加埋邊緣港腳為主。講左咁耐，其實今年都係繼續因為武肺冇得踢既，哈哈。

講起省港盃，呢個星期就有一位曾經既省港盃英雄卓耀國違反感化令所以入冊三個月。講起佢就真係好可惜，有天賦，但紀律極差。好似響元朗果陣，熱血教頭郭嘉諾都肯比機會佢，點知佢轉過頭就失踪避債，最近又淋紅油刑事毀壞判感化，但感化期間又食大麻，而家搞到咁都真係自己攞黎。

不過卓耀國呢單野雖然係新聞，但我個人就覺得絕對唔係啲咩年尾十大新聞嘞。
講紀律，又令人諗起10月果陣U23亞洲盃外圍賽，響日本既集體飲醉鬧事事件。最近足總公佈10名涉事球員分別係謝家榮、林衍廷、林樂勤、朱偉鈞、張俊軒、潘沛軒、伍家揚、葉卓文、鄭進泓及邵昀俊。謝家榮睇佢訪問同場入面指揮都幾有大將之風，最初真係估唔到作為隊長既佢都有份，唔怪得佢響球會冇得出。佢地今次全部被罰禁入港隊一年同罰錢，謝家榮響菁英盃不敵東方龍獅之獅之後雖然有道歉，但又夠膽死講：「外國球圈的紀律問題有些會從輕發落甚至無處分，既然現在香港足總有呢個罰則就唯有接受。」佢其實係咪覺得只係好小事?

不過咁，始終佢地都仲年輕，希望真係經一事蔡一智，繼續珍惜自己既足球事業喇。啊，今次阿CEO唔該唔好衝出黎柒嘞。

曼聯自武肺復出既第一仗就真係幾劣質，紐卡素係踢得幾好，不過最主要都係自己太易失左球權。係好肯逼肯搶，但咁辛苦搶返個波轉頭又失左，最後連紐卡素都贏唔到，睇黎前四真係凍過水。
聖誕快車賽期，利物浦同車路士都相繼失分，但我相信英超冠軍競賽尚未結束既。利物浦、車路士、曼城，英超冠軍離唔開呢三隊。

頭四既歐聯席位就更加難估，但我就咁鳩睇，熱刺響干地既帶領下表現好出色，已十一場聯賽不敗，應該係最大機會奪四。至於阿仙奴都有機，尤其是冇出奧巴美揚之後，成績反而仲越黎越好，對曼城打少一個先輸其實表現非常唔錯。我覺得個前四機會跟隨其後。至於曼聯同韋斯咸呢？屌，同上，我係曼迷都唔係幾信佢地可以拎到歐聯入場券。韋斯咸冇乜壓力，隨時有驚喜過曼聯。

冬季轉會巿場又開嘞，巴塞率先宣佈費蘭托尼斯加盟。我估計紐卡素應該會有唔少大動作，如果佢地執到幾件二線頭，要護級其實真係唔難。
講起紐卡素，最近傳聞話收購佢地既沙特財團PIF會收購上季意甲冠軍國際米蘭。如果成事既話，似乎佢地真係諗住響歐洲球壇大展拳腳。

好喇，下次再傾！

btw有興趣既可以follow下我:

ig: leafopen3
instagram.com/leafopen3

fb: leafopenleafopen
facebook.com/leafopenleafopen

個人網站: leafopenleafopen.com