Javier Hernandez is back in business

守拙 於 02/12/2018 發表 收藏文章

仲記唔記得當年成日幫曼聯入波嘅「小豆」查維亞靴蘭迪斯?喺費格遜年代頻頻喺關鍵時刻入波幫球隊反勝絕對令球迷津津樂道。
不過自從費格遜退休之後,佢嘅職業生涯都隨即荊棘塞途!先係俾時任教練莫耶斯棄用,再俾人借去皇馬坐板凳,之後經過去德國搵食一斷時間。最近重返英格蘭投效中型班韋斯咸,諗住可以有穩定嘅上陣時間。

點知上季球隊開局太差,季初邀佢加入球隊嘅比歷好快就俾人炒咗……咁都唔緊要,但係球會偏偏請咗以前喺曼聯唔鐘意用「小豆」嘅教練莫耶斯。莫耶斯黎到將阿奴杜棫改成正箭頭,一腳踢「小豆」落去坐後備。小豆以為去到韋斯咸可以有多啲時間,點知都係無,就好似上錯賊船一樣。

黎到今季,莫耶斯走咗,換黎前曼城教練「工程師」柏歷堅尼。以為換咗教練,可以一天都光哂?錯喇,一開季無耐,「小豆」就確診患上怪病「傳染性單核白血球增多症」,需要抖兩個月左右,真係打擊佢唔少!

11月初佢一復出對般尼後備上陣已經為球隊射入一球幫球隊贏波!及後再連續幾場後備上陣之後,終於打動領隊,今日對紐卡素一役可以正選上場!佢亦不負領隊所托,轟入兩球,幫球隊3:0大破紐卡素。希望小豆可以憑呢個入波一次忘記哂之前不愉快嘅經歷,繼續喺球迷面前發光發亮!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→