Gary White 接任?港隊選帥過程又合理嗎?

守拙 於 06/08/2018 發表 收藏文章

香港代表隊教練位置懸空都差唔多大半年,招聘事宜亦都進入咗尾聲,坊間亦傳出 Gary White 係被選中嘅一個,但係香港隊以全球招聘形式,再由董事會投票再決定去請咩教練呢個方式真係合理咩,今日就黎同大家探討下。

首先香港足總啲董事喺足球戰術上究竟識幾多野?憑幾個未必喺足球戰術層面上識好多野嘅人去揀邊個做香港隊教練係咪兒戲左少少?俾呢班高層揀人咪只係睇應徵者嘅履歷咁樣,而唔係喺教練本身風格符合香港隊與否,幫唔幫到長遠發展,佢過度黎又適唔適應到香港個球圈運作,高層心諗諗呢啲做乜呀,見到個教練最叻刷排名喎,刷到下排名咪叫表面上有成績,有成績政府咪繼續bump水,足總就快樂無憂喇,之不過實質水平未必提升高。

要長遠穩定進步,其實足總係應該定立完一個清晰長遠香港隊嘅踢法同風格係點樣之後,再籌組一個由專業足球人士組成嘅選帥組,每當教練職位空缺就負責研究有咩教練嘅風格符合香港隊本身嗰風格,再去送出一個邀約去合適嘅人選嗰團隊,咁先係合理同最幫助到香港隊嘅穩定長遠發展嘅做法。

否則好似而家咁嘅話,每一次換教練都隨時前後兩個教練風格、戰術取態都可以完全唔一樣,咁對香港隊長遠發展一定造成負面影響。加上其實助教團隊而家係分開招聘,計我話根本其實好荒謬,如果請番黎主教練同助教團隊理念唔一樣又究竟點合作呢?不過講到低如果想香港足球進步,足總一定要革新大換血㗎喇,而家高層班老人家鬼會咁做咩。

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→