齊心撐港隊 客戰伊拉克搶分非mission impossible|守拙預測

守拙 於 10/10/2019 發表 收藏文章


香港隊將會喺10月11日香港時間0:00作客伊拉克,進行世界盃暨亞洲盃外圍賽第二圈第三場分組賽賽事。雖然伊拉克當地亦有唔少示威,不過暫時睇落the game will go on。

唔少球迷覺得面對伊拉克,香港隊根本完全無得打,但係我就有少少相反嘅意見,我認為場波都未開打,唔洗咁快落定論住嘅!

對手伊拉克實力俾香港隊強係無可否認嘅事實,佢哋攻守轉換速度好快,一定比起香港隊快好多。不過留意番,佢哋係比較擅長踢啲快打快或者比較下風波嘅比賽,要佢哋主導形勢嘅比賽,佢哋一般打得無咁好。例如佢哋贏得越南一球,而面對實力稍微弱過自己嘅烏兹別克同巴林都未能夠打敗對手。

同時伊拉克後防都係有啲問題,睇番近期比賽精華片段,佢哋面對對方地面傳中嘅防守係非常差,成日都會出事而失波。只要個波地面傳中,兩個中堅就會有啲混亂。

我相信香港隊可以就對方弱隊有啲針對性部署。後防首先一定要縮得比較後,以免對手搵到空位;中場就要有運轉力比較高同埋體能比較好嘅球員幫手掃蕩同埋反擊,例如陳俊樂;而前場就需要有斬波靚嘅翼鋒同埋再配合走位比較靚嘅攻擊手,因此我認為今場波排出433係比較合適嘅戰術。以下係我嘅建議陣容。

GK:葉鴻輝

DF: 徐宏傑、艾里奧、羅素、丹尼

MF:陳俊樂、黃洋、陳肇鈞

FW: 徐德帥、艾力士、鐘偉強

最後,場波都未打,點可以咁快認輸呢?我認為今場波只要香港隊有應有嘅心態、合適嘅取態、合理嘅戰術同換人,再加上一定嘅運氣,香港隊今場作客要拎到分數並非mission impossible。香港人,今晚一齊撐香港隊啦!



留言


請按此登錄後留言。未成為會員? 立即註冊
快捷鍵:←
快捷鍵:→