香港波，垃圾波？ 精選

香港隊喺東亞盃出線之後，突然間又有冇睇開香港波啲人彈出黎話咩「咁開心，出線世界盃咩？」、「夠外援啫」……一堆質疑香港隊嘅聲音又再出現。
唔支持，可以有十萬個藉口。唔支持，嫌港隊「廢」，咁你咪唔好理。睇都未必睇過，之後見到啲傳媒報導話香港隊出線東亞盃決賽，就留言話香港足球點「差」法。無錯，東亞盃唔係一個好重要嘅盃賽，但對香港足球黎講，晉級到入決賽週都算係一個成就呀。你憑乜一句話否定哂佢哋嘅汗水同努力？有啲仲話自己落場都夠踢，真係幾好笑。其實如果有日香港隊殺到入世界盃，呢班人會唔會又話「都唔係贏咗世界盃，有乜好慶祝？」香港人，多啲欣賞人哋，唔洗凡事都貶低人㗎，咁世界會更好。

另外，鬧都跟番事實呀。代表隊係無外援呢樣嘢㗎！著得港隊件衫，都係貨真價實嘅香港人！你話某啲入籍兵仲差過本地兵、無關重要賽事選啲34、35歲嘅入籍兵入隊阻住後生仔上位，呢啲梗係得，可能大部份球迷都認同添。不過講入籍兵唔係香港人，係「外援」，就唔得！大佬，人地離鄉別井，留咗喺香港本地聯賽打拼七年咁耐，你估易挨呀？離開長大嘅環境，人地長期見唔到屋企人，一啲都唔易㗎。例如艾力士、中村佑人仲要融入香港文化，學廣東話、去茶樓食點心！佢哋肯融入香港社會，為香港打拼，又有香港護照同身份證，佢哋點解會唔係香港人？

乜膚色都好，大家都全力為香港隊拼博。如果因為膚色而唔覺得佢應該可以代表香港，就直情係歧視。點都好，希望大家放下成見，一齊支持香港足球！香港人都唔撐香港足球，邊個撐？