香港勁揪!歷史性第三次殺入東亞盃決賽週!

守拙 於 17/11/2018 發表 收藏文章


東亞盃第二圈外圍賽尋日終於落幕,香港隊最終憑住較佳得球晉級,歷史性第三次闖入東亞盃決賽週!

photo from hk01

第一場比賽面對住中華台北,攻足全場去到65分鐘先由麥基頭槌頂入先開紀錄。臨完場前俾對方追平之後,先由鐘偉強憑禁區頂拉弓射入靚波絕殺,僅僅可以贏到中華台北。

第二場比賽面對北韓,取態比起之前幾次面對北韓進取得多,比賽之中都有機會可以搞掂北韓,最後同北韓拉成平手,贏唔到波有啲可惜。

最尾一場比賽對住蒙古要拎得失球差,當然希望有咁多數咁多。頭二十分鐘無波入,當然有啲失望。不過之後憑住辛袓梅開二度加埋艾力士、麥基同法圖斯嘅入球,總算5:1大炒蒙古。北韓對台北要入3球先可以晉級,偏偏中華台北龍門潘文傑連番精彩撲救,令中華台北只係輸0:2,直接令香港隊出線決賽週!

之後以下落黎就再抽啲事出黎講喇!


最威水:「白咖哩」加利韋特

photo from now sports

上任之後五場僅僅輸過俾泰國,面對泰國、北韓呢啲比香港強嘅球隊唔似 Kim Sir 咁死守,夠膽進取啲進攻對手,已經獲得唔少球迷好評。今次東亞盃仲要晉級決賽週,你話佢威唔威水?不過佢都仲要幫球隊解決把握力比較差嘅問題。

好多負評:曾錦濤

photo from on.cc

由於徐宏傑因傷退隊,「主席」曾錦濤今次坐正成為正選右閘。唔少球迷批評曾錦濤嘅表現配唔起著香港隊嘅波衫,但係佢三場比賽都助攻助守,攔截又準,球迷批評佢係放題俾人任爆實在有啲唔合理。

最多負評:「香港杜奧巴」基奧

photo from singpao

唔少球迷都批評基奧表現乏善可陳,不過主教練加利韋特就認為批評唔公道,基奧做到衝散對方後防線嘅任務。
新星抬頭: 鐘偉強


photo from fox sports

補選入黎嘅年輕快翼鐘偉強,今次竟然間成為港隊晉級關鍵人物,真係始料不及。對住中華台北幫香港射入奠勝球,對蒙古喺右路亦好活躍製造咗唔少機會,以一個年青球員黎講,真係算係打得幾好。假如佢可以喺大埔持續獲到出場機會,佢嘅前途一定無可限量。

大會mvp : 黃洋

photo from hk01

相比另外一個防中黃威,黃洋稱職得多。喺防中位攔截、派牌、放直線都係一流,係香港晉級決賽週功臣之一。

中堅老化,要後生仔接班?

photo from hk01

羅素同法圖斯呢兩位入藉兵中堅隨住年紀老化、體能下降,速度亦都比較慢。對住中華台北、蒙古嘅快馬都顯得有啲吃力,係咪開始需要俾班後生仔上位接班呢?劉學銘、梁諾恆同余威廉都係一啲近年打得好又當打嘅本地中堅,值得喺之後一啲無關重要嘅賽事試下出佢地。


值得一讚:艾力士、葉鴻輝



photo from hk01
艾力士同葉鴻輝都分別喺對北韓嘅賽事受到碰撞之後受傷,不過佢哋都忍痛堅持比賽,絕對值得一讚。

最幫得手:潘文傑

photo from hk01

「要不是潘文傑,香港早就完蛋了。」中華台北門將潘文傑對北韓一次又一次神救,香港先可以出線!潘文傑,絕對係香港英雄!

總結黎講可以晉級決賽週惡鬥中日韓練下兵固然係好事,不過呢三場波亦顯示到香港前線嘅把握力有必要盡快改善。點都好,希望大家繼續支持香港隊!

香港勁揪!

留言


請按此登錄後留言。未成為會員? 立即註冊
    快捷鍵:←
    快捷鍵:→