異鄉尋夢 喺足球沙漠做全職球員|Elias Argueta |寶島足球故事|守拙

守拙 於 23/06/2019 發表 收藏文章

https://youtu.be/F7C_-AZ9sBI
我哋上次訪問咗台北紅獅洪都拉斯球員 Javi Funes,今次我哋再一次訪問喺台灣踢波嘅洪都拉斯球員。唔同嘅係,今次訪問嘅球員係一位喺台灣搵食嘅全職球員。佢就係效力台企甲球隊北市大同球員 Elias Argueta ,一齊黎睇下佢嘅故事。

18歲抵達亞洲 尋找足球夢

有乜嘢會驅使一個洪都拉斯球員去到台灣?Elias 兩隻字就可以答到你:「足球。」佢之後就解釋點解會揀黎台灣:「我16歲左右就已經加盟洪都拉斯乙組球隊,但係就冇上陣機會。過咗一排,阿哥去咗台灣學中文,我阿媽聽阿哥講嗰面生活環境唔錯,就叫我不如跟埋去亞洲喇!試吓喺嗰面搵球隊,就係咁,我為足球黎咗亞洲。」

不過佢嘅足球夢,並唔係一帆風順。「我喺中國住過一排,去過啲中國球隊試腳,例如係長春亞泰,不過冇一支球隊對我有意思,可能係因為我年紀太細。最後經過唔少人幫手,我先有得黎台灣踢台企甲球隊北市大同。」

讚台灣治安好 享受在台生活

上一次Javi Funes 話去到台灣要啲時間先適應到台灣嘅生活,但係同樣係洪都拉斯人嘅Elias 就表示去到台灣,無任何適應問題。「我黎台灣之前,阿哥一早已經幫我安排好哂,我好快就融入呢面嘅生活。呢面治安好好,出街好安全,唔會被人打劫,唔似得洪都拉斯成條街都係賊。夜晚你喺洪都拉斯,你根本唔可能走出街。台灣又有捷運(即係香港嘅地鐵),去邊都好易去。台灣環境唔錯,好享受喺台灣嘅生活。」

全職踢波 無任何兼職

台企甲唔係職業聯賽,俾人嘅印象就係全部球員都只係兼職踢波,本身有正職喺身。Elias 嘅回答,證實呢個諗法,係錯嘅。「我每日練完波,可能會意猶未盡,就去健吓身。有時就會去上網睇下戲,玩下社交網絡咁囉!我無兼職㗎,我係一個全職職業球員!我收嘅人工,比起踢洪都拉斯乙組聯賽嗰陣仲多!」

心態好重要 想踢亞協

Elias 覺得心態好重要。「一個球員嘅心態好重要,一定要每一場波都爭取一個好嘅結果。我哋北市大同成日贏波,但係我哋係想繼續贏落去!我喺長春亞泰練波嗰陣,我發現佢哋請啲外援根本都唔積極,我都踢得好過佢哋!我唔明點解要哂咁多錢,請啲咁嘅球員!我唔係話航源喺亞協表現唔好,我想北市大同下一季可以代表台灣出戰亞協,我感覺我哋會做得更加好!」

台灣足球若要進步 要進一步改善聯賽水平

最後 Elias 覺得台灣足球要進步,仲有好長嘅路。「台灣隊代表隊有外國教練係唔錯嘅第一步。要再進一步,就要台企甲裡面,請有質素嘅外援,改善聯賽水平。聯賽水平提升,代表隊水平就會提升,代表隊水平有提升。代表隊水平提升,大家就會留意,咁就會更多人去睇波,鐘意足球,帶動成個風氣改變,咁台灣足球自然會大幅度進步!」

留言


請按此登錄後留言。未成為會員? 立即註冊
  • eggegg88 於 24/06/2019 評論 NO. 1

    謝謝守拙的文章.. ^^

快捷鍵:←
快捷鍵:→