港超應該引入VAR 防止類似凱景球員對球證嘅過激行為再次發生

守拙 於 15/03/2019 發表 收藏文章

港超聯球證執法水準一向為人詬病,除咗唔少球迷比賽途中會因為球證具爭議性判決「熱烈招呼」球證之外,近幾季都唔少球員同教練會向傳媒或者喺自己社交網站公開批評球證執法,最近凱景職球甚至比賽後對球證有過激行為。種種跡象顯示,解決球證執法問題刻不容緩。

只係香港並無職業球證,大家平時熱烈招呼同問候嘅球證都有正職。平時要工作,星期六日再吹比賽,甚至有時候收工去吹,唔攰就奇喇。始終唔係全職球證,甩漏仲有啲,佢哋都唔想嘅。我就認為引入 VAR 可以解決成日爭議判決。

首先,引入VAR一定可以提升球賽嘅公平性。港超出現爭議性鏡頭係好常見,誤判成日發生,好多時俾人覺得球證偏向某一方。如果有VAR,球證就可以翻看多個角度嘅錄影帶,從而再作出最正確裁決,減少誤判,令比賽更加公平。

其次,球證翻睇咗VAR可以減少球員同教練嘅不滿。球員同教練好多時會質疑球證睇唔清楚嘅情況下走去吹罰或者漏吹...有VAR就令球員同教練喺爭議判決裡面,減少對球證嘅不滿。球證翻查多個角度嘅錄影帶,先再作出判決,誤判嘅可能性已經大大減少。

加上,有咗VAR球場上焦點可以重新落番喺球員身上。港超成日都會因為誤判,而令球證判決成為比賽焦點。有咗VAR,比賽難啲有誤判,焦點落番去球員度。入去睇波本身就係觀賞球員踢比賽,而唔係睇球證表演。有咗VAR,誤判少咗,球迷可以專注番支持球隊,而唔係去問候球證。爭議判決少咗,球員就唔會走去鬧球證,會更加專心踢好波!

最後,你可能問要引入VAR?好貴嗰喎,天荒夜談!其實足總每年收香港政府咁多錢,有冇實際上幫到香港足球呢?俾咗咁多錢,本地青訓水準、比賽強度都無乜提升,有啲錢仲去咗裝修足總。與其浪費咗咁多錢都冇乜用咁,不如就掟錢引入VAR 改善球證喺比賽嘅執法。引入VAR,對香港足球黎講會係件好事


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→