曼城後防錯漏多 要再拎英超一定要改善

守拙 於 13/08/2018 發表 收藏文章
上季英超冠軍曼城作客以2:0輕取啱啱進入後雲加時代嘅阿仙奴,進攻方面繼續板斧好多、全場攻勢水銀瀉地就唔洗多講。後防反而就似乎出現咗問題,好幾次嘅犯錯都差啲失波,只不過阿仙奴球員喺曼城後防球員每一次出現犯錯嗰陣都操之過急先把握唔到,否則曼城其實隨時俾人追和,甚至輸波。

第一個表現比較遜色嘅曼城後防球員係門將艾達臣。佢一向除咗撲救能力好之外,傳球能力亦係十分出色。當初哥迪奧拿買佢返黎就係睇中佢呢樣嘢,之不過今日就完全出哂事。今日其實阿仙奴攻勢就無乜威脅,艾達臣反而不斷自爆傳失波俾對手,只係對面幾次無論奧斯爾、拉卡錫迪同mk仔麥希達恩都把握唔到先無致成大錯。查實上年對利物浦嗰時已經試過交失波俾沙拿笠入,希望艾達臣以後傳波嗰陣減少啲失誤喇。

另外一個表現較為遜色嘅曼城後防球員係左閘嘅文迪。佢嘅後上進攻能力唔錯,但係走位同踢法似乎仲未習慣tiki taka嘅踢法,同隊友有啲隔隔不入嘅感覺。防守亦唔見得穩陣,成日守唔住對面後上助攻嘅右閘比爾連。不過好彩佢雖然攻守都未做得好,但係阿仙奴球員打得更差,佢嘅不濟演出無影響勝負。

兩個中堅同右閘獲加表現都中規中矩,只係有一兩下唔集中走漏左奥巴美揚一次,整體黎講叫做算係咁。不過曼城要再拎聯賽冠軍,後防表現一定要提升,再係咁久唔久就走甩一次人,或者龍門係咁自爆交失波,咁對般尼都隨時會出事。

留言


請按此登錄後留言。未成為會員? 立即註冊
    快捷鍵:←
    快捷鍵:→