改朝換代勢在必行,左楊右華出走係時候?

守拙 於 19/01/2019 發表 收藏文章

左楊右華嘅艾舒利楊格同華倫西亞都係由傳奇領隊費格遜引入到曼聯,近幾年亦係曼聯嘅絕對主力,只不過近日就傳出佢哋好大機會季尾齊齊離開曼聯。更有報導指出,意甲前列份子國際米蘭有興趣將佢哋兩個打包,一次過簽哂佢哋。

由費格遜年代佢哋一左一右雙翼齊飛,到雲高爾大打三中堅將佢哋改造成翼衛,再到摩連奴年代素性將佢哋變成兩閘……近年就算喺邊個領隊低下效力,要打咩位置都好,佢哋都落力比賽,交足哂功課。楊格就更加試過搶走迪馬利亞嘅正選位,令到迪馬利亞嬲嬲豬走人……

只不過天無不散之延席,總有一日佢哋都終歸要離開。而呢一日,好可能就係季尾嘅時候。艾舒利楊格同華倫西亞如果真係今季尾走人去意甲,其實係對球隊同球員本身都有好處嘅。

今季佢哋已經開始跌watt,而後起之秀梳爾、戴洛特,甚至外借到富咸嘅科素文沙都有唔錯嘅潛質,但係有潛質都需要好多上陣先會進步。如果艾舒利楊格同華倫西亞繼續留喺度,而佢哋又無傷無病,一定會影響到呢啲後生仔嘅上陣時間。況且佢哋去節奏比較慢啲意甲,體能唔洗用咁多,亦較容易適付,更加有助佢哋延續球員生涯,絕對係件好事。

曼聯球迷可能會好唔捨得,不過為球隊好又好,為佢哋自身又好,係時候講句拜拜喇。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→