如果車路士炒沙利 就係超級大傻仔

守拙 於 19/03/2019 發表 收藏文章

即使上季拎到足總盃冠軍,但係車路士今季季前仍然選擇辭退意大利藉教頭干地,轉而聘用同樣係意大利藉嘅沙利。沙利帶隊初頭成績唔錯,不過最近成績有啲唔穩定,中間又出現過門將基柏事件,傳媒爭相報導車路士高層考慮喺幾日內辭退沙利。如果你問我點睇,我係絕對反對炒沙利嘅。

首先,磨煉進攻打法係需要一定嘅時間。歷代車路士教練由摩連奴、安察洛堤、迪馬堤奧,以至上季嘅教練干地都係防守型教練,令隱守反擊漸漸成為咗球隊風格。不過班主阿巴謙莫域一直希望球隊大打進攻足球,咁今夏請嚟嚟主張控球在腳嘅沙利絕對係合理嘅選擇。只係一支本身打開防反嘅球隊,要轉型成為傳控、控球在腳嘅球隊當然要有段時間適應,會出現陣痛期。沙利嘅傳控風格喺拿破里都經歷咗成三季先慢慢取得成功,如果球隊真係想轉型成為傳控、控球在腳嘅球隊,就絕對唔應該炒沙利,要相信沙利。一個教練教到個進攻戰術體系以佢嚟命名(Sarri Ball),證明佢能力一定好好,絕對信得過。

其次,呢個時間炒咗沙利根本無合適教練可以接手。市場上可以即刻聘請嘅頂級教練唔多,適合車路士嘅就更加係error 404 。摩連奴同干地都無乜可能回歸、盧柏迪古教皇馬教到咁,你夠唔夠膽請?仲有莫耶斯揀嘅……不過公佈佢上任,車路士球迷可能拆咗個史丹褔橋都似。升蘇拿上主教練?睇佢以往帶隊往績先啦!求奇搵個名宿翻嚟教?世界上邊有咁多個施丹同蘇斯克查!如果炒完沙利好大機會仲衰過而家,咁梗係唔炒啦!

加上,就算俾你真係搵到頂級教練,好似哥迪奧拿呢啲級數嘅,你未來個季成績一樣唔會太好。你要記得未來兩個轉會窗,車路士係唔簽得人!新教練係冇得透過買賣令球隊可以踢到佢自己嘅理想足球……好簡單如果新教練鐘意打防反,咁仲要一個派牌型嘅防中佐真奴嚟做乜?而家呢班人至少係沙利心目中打傳控足球,尚算可以嘅人選呀,咪俾沙利慢慢train 好個sarri ball囉!你一隊本身打防反嘅球隊,請得一個主張控球在腳嘅進攻教練,唔係應該預咗會有陣痛期嘅咩?

你可能話炒咗沙利,球隊短期內會有刺激作用。咁我問你,咁長期呢?如果喺一個由防反改革梗成為傳控嘅過程嘅時候,突然又走去炒個教練,球隊方針究竟想點呢?所以講到尾,我都係認為車路士應該留住沙利。炒沙利,只會令球隊前路更加難行。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • 亞男
    亞男 於 20/03/2019 評論 NO. 1

    安察洛堤 嗰季入左幾多球有冇查清楚?失望!

  • 亞男
    亞男 於 20/03/2019 評論 NO. 2

    安察洛堤 嗰季入左幾多球有冇查清楚?失望!

  • KenChan沙田友
    KenChan沙田友 於 21/03/2019 評論 NO. 3

    Sarri 60歲無冠唔係偶然,但艾巴反覆性格才是主因:


    1. 又冠軍也要踢得漂亮!
    花$買小妖丶搞青訓,到頭來不用賣走兼過份重用老將!
    建隊方向不明?想想一個飛機師又左又右,爬升後又突然下降,而且不斷改變方向,一定機毀人亡!


    2. 另外,撇開恒常炒教練Granovskaia不專業管理問題,車仔球員近年難以管理和擔大旗問題,就係冇訓練林8、泰利、杜奧巴的接班人,重心球員老化,中生代沒有作好接班準備 : 車仔資歷中生代或年輕有潛質球員很多都變過客: Mata到Matic、小妖盧卡古、迪布尼,Luiz被賣後又回來,美利拉斯表現效力一年在表現尚可竟然被賣走(其實當年應放棄艾辛),還有無數過客。

    其實林8、泰利、Drogba離車時候已經比世上多數同位置球員退休歲數還要年長。

    好似當年法國98世界杯+00歐國杯+01洲際杯三冠一樣,施丹、迪西里、利沙拉素、杜加里、佐卡夫成班老大哥長期霸佔更衣室後嚴重老化,亨利、韋拉果班係有實力既年輕人但前面果班大佬長期霸佔主力,這班中生代很難有權威去帶隊,去到02世界杯,主力老化後立刻仆直首圈出局,始後法國10多年浮浮沉沉(06世界杯亞軍係迴光反轉),直到近幾年才復甦。

    車仔沒有法國的稱霸力,但艾巴上車10多年,解僱教練不少,但奪冠不少,而且從沒有連續兩季四大皆空(已經不計社區盾等季後錦標,而且即使今季四大皆空,定律仍生效),皆因車仔有兩次球員紅利,第一次是艾巴上車初時連續兩三年大手買入中上級球員,例如Drogba、Cech等長年骨幹,還是Robben、Duff、祖高爾、Makelele、卡華路,配以林8、泰利等原已在隊的本土年輕球員,第二次是車仔老化聯賽第6但歐冠奪冠後買入Hazard、AZP、Oscar、摩西斯等(車仔第四、五次英超冠軍,他們至少有一次功勞)。

    不過令人可惜是,其實歐冠無論是否冠奪,車仔係必須年輕化,結果係車仔奪冠後仍34歲的林8、32歲的泰利做重建核心(尤其是林8,中後期越來越球霸化,很像努爾、卡斯拿斯在皇馬後期),所以必然出接班問題。

    摩一走後,林8丶泰利丶Drogba丶Cech等隊委,佢哋係更衣室權利好大,基本摩一二之間很多時候贏波唔係教練功勞,更似佢哋帶隊自動波! 所以艾巴同佢哋關係極好,才導致隊委越來越球霸! (其實歐冠奪標後一兩年如要年輕化,車仔需要係不介意後備不鬧主力的林8,但事實係閙主力不服老的林8和不介意後備但實力平庸又多hea踢冇追求的米基爾,而2人都在同一組位置,導致防中位在2012年後兩季內不能換血成功,直接斷送換血良機!)

    摩佬(二期)返來送走很多中新生代(這真接令車仔第二次球員紅利食完),不過,摩二送走當時兩尊佛:林8(球迷喜愛但老化又不肯打後備)丶托利斯(艾巴喜愛但長期冇入波,又直接弄走競爭者),迎來二人代替代品(Costa丶法比),才有第四次英超冠! (同樣,干地直接架空隊委泰利丶伊雲奴域,車仔才有第五次英超冠軍,要是干地丶林8有緣做師徒,2人100%開片)

    現在車仔球員紅利接近食完,Hazard不續約、Azp、Luiz老化,車仔恐怕要沉幾季。

    巴塞夢二有球王級癲佬、古利、迪高,後期不行直接送走,大膽起用年輕人美斯、沙維、小白才有夢三盛世。 這些條件在車仔冇法做到 ~ 無論車仔班近年青訓不錯,或直接買入的比利時小妖(Lukaku、KDB),摩佬二期或往後球練一一拒絕使用(干地試過半季從櫻桃軍重召外借Nathan Ake,球隊奪冠但佢基本冇出場,導致後者決心直接轉投櫻挑軍;Sarri對Odoi使用也令Odoi和拜仁慕尼黑眉來眼去)反而多次買入水貨,令車仔重點引強援能力大減。

快捷鍵:←
快捷鍵:→