大埔輕鬆贏波,星期三準備惡鬥黎明!

守拙 於 10/03/2019 發表 收藏文章

早場有富力作客南區補時慘遭絕殺追和,而和富大埔尾場同樣作客,不過就喺將軍澳輕鬆擊敗打少一個人嘅理文,將同榜首富力嘅差距縮減成一分。

今場和富大埔可以話係踢得非常輕鬆,事關今場對手理文實在係踢得好差。今場理文防守嗰陣感覺上壓迫力唔強,大埔可以好輕鬆咁慢慢攞住個波猜;相反,到理文組織進攻嗰陣又好易兜口兜面交失波,大埔好易連迫都唔洗迫,就可以扲番嗰波。前場亦就當然幾乎完全組織唔到啲有威脅嘅埋門。

大埔入嘅兩球理文後防都非常鬆散,第一球高波吊入去,竟然完全無人mark遠柱嘅陳肇均,俾佢輕鬆搞掂。第二球伊高沙托尼禁區頂一路推入去禁區射波,都無人施加壓力,條防線好似紙板咁……

攻又唔得,守又唔得,理文輸波就理所當然,教練陳曉明著番贏傑志件紅衫都無用。雪上加霜嘅係白智勳兩次無謂情況下拎黃牌,兩黃一紅被逐,下場需要停賽。理文季初大肆擴軍,球隊成績就無乜提升,究竟係乜原因呢?

不過對大埔黎講,今場贏得咁輕描淡寫絕對係好事。佢哋星期三就要打亞協外圍賽,主場擺陣鬥黎自朝鮮嘅球隊黎明。今場輕輕鬆鬆過關,球隊無乜出力就贏到,連主力伊高沙托尼都可以早早退下火線休息,可以話養精蓄銳星期三再鬥過!星期三大家一齊支持香港代表和富大埔,希望佢哋可以喺亞協外晉級!

留言


請按此登錄後留言。未成為會員? 立即註冊
    快捷鍵:←
    快捷鍵:→