大埔爭標重要棋子：充滿活力的他 精選

有活力、活動範圍大、鐘意後上插入射波，呢啲咁嘅形容字眼，你會諗起邊個？你好可能會諗起即將轉投祖雲達斯嘅阿仙奴中場艾朗藍斯，不過今日我哋講吓同樣有呢個功能，效力梗喺港超聯球會和富大埔嘅中場：陳肇鈞。
有睇開港超嘅球迷一定對佢唔陌生㗎喇，曾經出國訓練嘅佢正式出道嗰陣跟住李志堅，都可以算係堅家軍一員。之後憑著出色表現離開堅家軍，去咗南華、東方呢啲大會效力，不過始終大會中場競爭激烈比較，好難穩定地有長期上陣機會。上季俾東方外借冠忠南區，期間表現唔錯，贏得到唔少嘅好評。今季佢跟番李志堅，加盟咗夏天大肆擴軍、矢志挑戰聯賽嘅和富大埔。

陳肇均 鈞加盟大埔之後並無令到球迷失望，交出極為出色嘅表現，協助大埔黎到季尾都仲係爭標份子之一，亦幫佢自己拎到港超12月嘅最佳球員。陳肇均其實對大埔黎講，係爭標路上極為重要嘅棋子。雖然佢派牌能力、視野呢啲相對上無隊內其他中場咁好，不過佢走動多、活動範圍大，為球隊帶黎唔少活力。有咗佢喺中場，強強大戰尤其有效。隊中其他中場梁冠聰、利馬等人活動範圍比較細，梁冠聰專注防守較多、利馬就多數負責策劃攻勢……而陳肇均走上走落，就可以做一個好嘅橋樑，令球隊攻守嘅轉換做得比較好一啲。
另外球隊面對密集嘅時候，辛祖、哈利、伊高沙托尼好多時都會成日企喺前場，禁區頂附近啲位置，對面死守嘅時間俾人mark到實，比較難搵到位攻擊，但係喜歡後上嘅陳肇鈞成日本身係中圈附近，之後突然係後面插上黎加入攻勢，會令到對手就比較難防守，密集亦可以撕破到。事實上佢喺本地賽場射入過6球，以一名中場黎講，已經係一個唔錯嘅數字。

和富大埔而家除咗港超，仲有亞協同足總盃兩個重要嘅賽事都打，今季表現出色嘅陳肇鈞，可唔可以幫助到和富大埔至少令到其中一個賽事嘅冠軍寶座，脫離近年「千年老二」嘅稱號呢？表現出色嘅陳肇鈞，又會唔會吸引到港隊嘅注意，可以成為大港腳呢？