古天奴去曼聯?你又信唔信?

守拙 於 14/01/2019 發表 收藏文章

近期有唔少傳聞竟然話前利物浦球員古天奴有機會由巴塞加盟曼聯,唔知大家覺得有冇可能成真呢?不過從戰術角度上面,曼聯係完全無需要引入古天奴嘅。

古天奴可以打嘅位係左翼或者攻中。佢打左翼就會經常內切入中間射門或者去組織攻勢,似打一個半十號位嘅角色。打攻中嘅話就會長期喺禁區頂活動,成個球隊嘅進攻就係會圍住佢黎建立。不過兩個佢擅長嘅角色,放入曼聯而家蘇斯克查執教低下嘅班底同體系,只會拖累曼聯。

曼聯右路本身無論出連格特或者馬達都好,佢哋都比較喜歡內切入打個十號半位去幫手組織攻勢,所以現時左路嘅馬斯亞就多數會用速度喺邊線拉多啲邊去製造空位。如果左路換成係古天奴,咁佢冇乜速度,好難去喺邊線突破,久而久之就會自己成日cut入中間亦會變成個半十號球員,咁就會無人去製造空位,形成中路大塞車!

你可能會問,咁佢打攻中,做球隊進攻策劃中心,唔得咩?其實係得嘅,不過呢個位置已經有普巴咩佔有。普巴呢排打得好好地,又無理由突然會俾一大堆錢買人取代佢個位吖。如果叫佢打防中派牌,佢身型單薄得濟,一定俾人撞散。咁學曼城咁打雙核又得唔得呢?打雙核一定抽起靴里拉,咁少咗一個box to box中場,令本身曼聯不憾一擊嘅防線勢必面對更多壓力,更加易失波,絕對唔係一個good idea !

戰術角度上無乜作用,但係商業價值上對曼聯黎講就點都會有啲嘅,始終簽入一個前死敵星級球員喎。不過如果交易成功,古天奴投效曼聯,番到英國亦一定會俾利物浦球迷狙擊同咒罵。每日俾人鬧,古天奴會頂得住咩?只不過估計呢單都係傳媒亂作嘅轉會傳聞黎嘅啫,就算古天奴真係想去曼聯,曼聯都唔會去出動大批資金去簽佢喇!曼聯而家當務之急一定係需要簽入後防球員去增強後防實力,而唔係加強本身已經火力十足嘅中前場。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • kinfung
    kinfung 於 14/01/2019 評論 NO. 1

    哈哈請笑

  • Cz Zian1
    Cz Zian1 於 15/01/2019 評論 NO. 2

    不如买实力派后防啦

  • 4466hk
    4466hk 於 15/01/2019 評論 NO. 3

    今時今日,做記者、做傳媒,係咁上下啦!最好笑係有d轉會傳聞,都已經傳咗一兩年甚至以上,但仍然照講,甚至連篇稿裏邊嘅所有字都冇改過,而內中嘅主角,或者傷、或者病、或者老、或者其他原因,正式今時唔同往日,但都可以一字不變噉照寫,有乜嘢職業好得過做呢啲記者丫?

快捷鍵:←
快捷鍵:→