努力換成功 道菲斯國腳夢成真

守拙 於 16/10/2018 發表 收藏文章

本身荷蘭嘅右閘位置呢幾年主要係由真馬特、科舒文沙、赫達保亞同迪迪呢四位球員輪流擔任,但係四個球員嘅表現都表現比較一般。喺呢輪國際賽咁啱真馬特、科舒文沙同迪迪呢三位右閘傷哂,而赫達保亞狀態亦麻麻,主教練朗奴高文就喺面對宿敵德國嘅大戰大膽地派出一位今季喺荷甲表現得幾好嘅小將道菲斯!(Denzel Dumfries)

“Dumfries “,可能呢個名你之前從來未聽過,或者你可能會即係諗起英國蘇格蘭嘅城市″Dumfries″。不過今日嘅主角喺歐洲國家聯賽代表荷蘭正選上陣面對德國、守到德國添姆雲拿「一棟都無」嘅右閘 道菲斯 (Denzel Dumfries)。

呢位球員今年都仲係22歲仔,2014年未正式喺職業聯賽亮相就已經幫過阿魯巴代表隊喺國際友誼賽對住關島上陣,並且入埋波協助球隊贏波。去到2015年先喺當年喺荷乙嘅鹿特丹斯巴達出道,出道嘅第二年就已經幫球隊升班兼拎埋荷乙最佳年青球員。2017年夏天就轉投實力更強嘅海倫芬,並且持續有唔錯嘅表現。今年夏天就更上層樓,去到呢個荷甲傳統勁旅 PSV燕豪芬。
更唔簡單嘅係開季嘅每一場由荷蘭超級盃、荷甲定歐聯都好,佢都場場正選上陣,又交出上佳表現,喺右路助攻助守。面對烏特勒支嘅荷甲比賽更加射入一球,協助球會贏波而回。看似一路順風嘅球員生涯,最近都繼續好順!出色嘅表現令朗奴高文將佢列入荷蘭大軍,並且喺對德國嘅大戰派佢正選登場。

佢接受訪問嗰時話,就喺佢對德國出場之前,佢原本好驚青,突然佢妹妹喺電話send左一張相俾佢。張相係2014年佢仲係一個荷蘭隊球迷,坐喺商場同廣大其他荷蘭隊球迷一齊睇世界盃直播支持球隊嗰時影嘅。佢醒起當時心裡面諗:「終有一日,我要著起個件戰衣就好」,結果佢就心裡面同自己講:「驚啲乜,呢個唔係自己一直以黎嘅夢想咩?」,之後充滿信心咁行出場比賽。

喺比賽入面道菲斯好振定,完全唔似一個第一次幫荷蘭隊上陣嘅球員。佢有唔錯嘅身型同速度,亦有好好嘅位置感同防守意識,面對住德國新星添姆雲拿同後備上陣嘅辛尼都係速度快、盤扭技術唔錯嘅球員,都令到對方完全無辦法過到自己。佢亦不時會後上插入進攻,成場波無論攻守方面都交出相當亮麗嘅演出。

完場之後,佢接受訪問就話:「比賽節奏同水平比荷甲高好多,德國啲球員亦全部都有豐富嘅大賽經驗,呢場比賽相當難應付。好彩我哋有個出色嘅表現,加上一啲運氣,先取得呢個結果。我無交換波衫,因為呢場地標戰得黎不易,我會放件衫入畫框再掛喺屋企。」

另外,佢仲勉勵其他年輕人去實現夢想:「我經過好多努力先有今日呢個成就!我細嗰嗰陣就立志要幫荷蘭隊上陣,個個都同我講:『無可能㗎,咪玩喇!』。結果呢?結果我每日好用心咁訓練,好好咁計劃一切,一步一步咁去實踐成為足球員嘅夢想!我平時睇好多波,我睇係為咗睇人哋點踢,從而幫助自己成為一個更好嘅球員。每一次睇,我都會take notes,寫低有乜之後自己踢嗰陣要注意!我亦都會重睇自己比賽,去睇自己有乜改善空間。我到而家呢一刻,我都仲會做以上呢啲步驟!我一陣番去就會update我啲筆記。

我想話俾大家知,我無天生嘅足球天賦,無乜腳法,但係靠住後天嘅努力,有咗大隻嘅身軀、無限嘅體力,我成功實現夢想!大家年輕人,只要肯努力,無野無可能!」


作為一個年輕球員咁振定、謙虛,講野又大方得體,雖然未出國踢四大聯賽,我已經好欣賞呢位球員,係一個好好嘅學習對象。keep住呢個表現同心態,荷蘭正選右閘未來十年都係佢嘅都唔定!希望佢可以儘快出國踢波,成為一個更偉大嘅球員。


留言


請按此登錄後留言。未成為會員? 立即註冊
    快捷鍵:←
    快捷鍵:→