[球筆著地] 斑馬配得上入一球,但始終沒有...

球筆著地 於 04/04/2018 發表 收藏文章
坦白講,3:0呢個比數反映唔到球場上戰況。

https://www.youtube.com/watch?v=zDWaPQIBJNo(其實精華都反映唔到球場上戰況)

歐聯8強開戰,就係上屆決賽翻版。帶住上年慘敗嘅心理陰影,加上陣容不整,祖記主場出擊都排出一個比較保守嘅陣容。

但好可惜,3分鐘右路已經被攻破,伊斯高右路傳中,C朗被力壓下快腳腳面彈去遠柱,保方撲都冇得撲。

皇馬第一個攻勢,就已經釘咗第一口棺材釘。


係本身嘅戰術又好,焗住要做主動又好,祖記頭65分鐘嘅逼搶係非常奏效,擺脫咗上年敗仗嘅陰影。辛度、基迪拉、賓坦古亞等中後場球員多次殺入皇馬陣地,只可惜埋門一腳遇上當Fit 嘅拿華斯,無法扳平。
相反,拎住一個作客入球嘅皇馬,更加樂於打反擊,每次攻門都相當有威脅,門楣都幫保方頂咗兩嘢。

把握力成為今場嘅分野。
(來源:網上圖片)

上次提到祖記反勝熱刺晉級全靠兩劍封喉嘅把握力。今場兩劍封喉嘅威力就落喺C朗腳上。第一球快腳彈遠柱,第二球教科書式倒掛,保方都保唔住個後方。

(來源:http://bleacherreport.com/)

而全晚最大嘅轉捩點係去到66分鐘,迪巴拿兩黃一紅,相比上屆決賽隱形零表現,今場迪巴拿嘅眼神,明顯有火有決心,串連中前場又多次個人突破,迫到對手犯規,可惜未能將危險位置嘅罰球化做入球。
落後兩球又打少一個,令祖記進退失據,踢起嚟畏首畏尾,再次跌落陰影黑洞,陷入信心危機。由失第二球、踢少一個再到失第三球只係8分鐘嘅事,第三球明顯見到防線嘅混亂,喺危險位置畀皇馬短傳撕破,C朗助攻馬些路攻入第三球。

3:0,牢牢咁釘上第三口棺材釘。

高手過招,一次犯錯足以致命,但偏偏犯了三次。第一球 Double team 走漏easy goal ; 第二球基亞連尼同保方溝通出錯;第三球防線混亂裝越位失敗。

但再重申,今仗祖記踢得並唔差。而值得一提嘅係,今場祖記行軍速度,係近來少見嘅高速同活力,絕對唔再係老婦人。

對於下場作客班拿貝,雖有比真歷,賓拿迪亞復出,但失去迪巴拿同今仗表現不俗嘅小將賓坦古亞,要贏皇馬三球相當有難度。但擔心之餘,又有啲期待囧帥會點變陣去爭勝。

(來源:http://bleacherreport.com/)

出局幾成定局,次回合都冇嘢可再輸,寄望放低包袱,放低陰影,放手一搏,唔求奇蹟,但為保方最後一場歐戰出盡全力!

如果琴晚最後一擊古亞達度門前射入追返1:3...但足球邊有如果丫...
(來源:http://www.bta.bg/)
標籤: 歐聯  祖雲達斯  皇家馬德里  8強  

留言


請按此登錄後留言。未成為會員? 立即註冊
    快捷鍵:←
    快捷鍵:→