【#世界盃】等你下課?西班牙陣前易帥 怒炒盧柏迪古

森美爾足球勝地 於 13/06/2018 發表 收藏文章
西班牙足總會長魯比亞斯喺新聞發佈會上宣佈,將成為皇馬主帥嘅盧柏迪古將辭任西班牙主教練一職,並直指佢嘅行為「不可接受」!

盧柏迪古喺世界盃踢完之後執教皇家馬德里。

西班牙足總同時宣佈,將會放棄盧柏迪古200萬歐元嘅違約金。

前一晚(6月12日晚上),皇馬官方宣佈盧柏迪古將會喺世界盃結束之後接掌球隊。引述《馬卡報》消息指,西班牙足總主席魯比亞斯喺皇馬官方宣佈之前5分鐘,先至接到佩雷斯嘅電話,從而知道呢項消息。咁樣令到魯比亞斯非常不滿,並且希望能夠即時將盧柏迪古炒魷魚!果然,今日(6月13日)就開記招喇!

據報導指,魯比亞斯認為皇馬搵新教練其實冇錯,不過唔應該喺呢個時候公開。亦有消息指,西班牙國家隊裡面嘅7位皇馬球員,已經提前收到風,知道下一任領隊好可能係盧柏迪古。

陣前易帥,臨急臨忙搵邊個教呢?今次唔多唔少都會影響西班牙隊裡面嘅士氣同備戰情況,帥位有傳會係現任U21教練施拉迪斯或者西班牙體育總監希亞路接任。西班牙第一場將會係星期五對葡萄牙。

來源:TheGuardian

留言


請按此登錄後留言。未成為會員? 立即註冊
    快捷鍵:←
    快捷鍵:→