[K11出品] 曼聯K角度 – 費格遜時間絕殺取得3連勝!

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


作客侯城,本以為是一場輕取的賽事,但賽前侯城與曼聯同樣2戰2勝得6分,而且今場雨戰下,雖然曼聯攻足全場,但明顯雙巴發揮受影響!結果有福仔之稱嘅拉舒福特,繼上季閃亮登場後,今仗再於曼迷稱為"費格遜時間"的補時階段,絕殺侯城,全取3分!為9月曼市打比戰迎來好兆頭!


陣容方面,摩連奴於國際賽期前未有作出輪換,反而與對上2仗陣容一樣!龍門繼續由迪基亞把守,後防維持今季嘅陣容,由右至左分別為華倫西亞,拜利,白蘭特及梳爾,防中方面費蘭尼繼續正選,另一中場當然是普巴!攻擊組合方面,馬達仍然能爭取正選上陣,加上朗尼及馬素爾!單箭頭繼續為伊巴謙莫域!


迪基亞今場觸球繼續少,這是曼迷樂意見到嘅事,8次射門其實都有4次中框,但均屬於無角度及無力嘅射門,反而最危險是出現在賽事尾段侯城一次遠射,皮球省中拜利改變方向下,迪基亞已失位,幸好皮球向底線飛去,否則,曼聯可能要遇上滑鐵盧了!

後防方面,繼續是右路嘅華倫西亞,今仗繼續助攻,但其突破及助攻威脅受天雨影響,未有之前2仗突出,但明顯佢與馬達於右路嘅默契日漸成熟,互相補位下,華倫西亞其實仲似一名右翼!左閘嘅梳爾,今仗繼續其穩定表現,不過我K11則略覺得梳爾雖然有助攻,但通常於K角位位置便嘗試出波,較少有地爆落底線出波或突破,其實以梳爾嘅助攻力應可如此,或者都是場地影響發揮吧!


中堅方面,白蘭特繼續成為摩連奴首選之一,其實用腦踢波嘅中堅實在少見,而白蘭特嘅弱點是身體對抗性較弱,但由於中場嘅費蘭尼及普巴在前,拜利在旁,令白蘭特反而變得淡定,多次從後搶截也以頭腦來佔優勢,少有地與對方硬碰!呢方面,交給另一中堅嘅拜利負責,而拜利亦繼續表現穩定,雖然今仗侯城帶來嘅威脅極少,而拜利亦保持水準,再次成為MOTM,攔截成功率極高,為迪基亞作保護非常成功。




防中方面,費蘭尼則於賽事初段較為魯莽,2次不必要嘅犯規令對手得到罰球直接攻門機會,自己更因此領黃,但領黃後,費蘭尼反而變得冷靜下來,回復今季之勇態,多次攔截成功更傳送予隊友腳下,與上季之比實在是天淵之別!可惜賽後摩連奴證實費蘭尼有少許背傷,希望經過國際賽期後,能以最佳狀態迎戰曼市打比!另一中場普巴,今仗發揮明顯比上仗差,而且轉向嘅速度也減慢了,反而多了自己作突破及遠射嘅情況出現,但礙於大雨,令其發揮受影響下,今仗對於普巴而言,或者是有點不合格了,但最重要是未有受傷,留待曼市打比再次証明自己身價吧!




進攻球員方面,左路嘅馬素爾繼續狀態低沉,上季冷靜而且有效嘅突破未見,反而有點太心急,或者仍未習慣與上季以佢為重心嘅球隊踢法,只希望佢能慢慢適應及回復狀態吧!60分鐘由米希達恩入替,入替後嘅米希達恩,以進攻中場身份出現嘅情況較多,同樣地,或者當時球隊仍未打破缺口,米希達恩也顯得太點心急,不過其突破真的有點吸睛,繼續期待此名上季德甲最佳球員日後發揮其最佳狀態下嘅演出!


右路嘅馬達,今仗雖然未有太大貢獻,但佢與華倫西亞右路嘅配合非常不錯,而且全場走動也多,馬達真的不再是摩連奴當年眼中只攻不守的10號球員了!馬達今仗也曾於右路作突破後傳中可惜無人接應,但馬達於70分鐘被入替前,有一球打了伊巴荷包,此球如果射入當然抵讚,但可惜最後不入,則要鬧鬧了!因當時伊巴一個轉身,順勢面對龍門,如果非馬達打荷包,伊巴隨時射破網!在此說明,我K11非輸打贏要,但當一名球員整套動作做得非常流暢,其實讓其完成可能更好,加上他是伊巴,能成功完成整套攻門動作嘅機會率也非常高,似乎默契上仍要多多配合了!


入替後嘅拉舒福特,其位置於左或右翼出現,不時作出突破,效果其實也較馬素爾為佳,而最重要嘅係,此名福將於92分鐘接應隊長朗尼神奇地底線爆破後傳中射入致勝球,令球隊全取3分!似乎馬素爾要小心其位置受福仔威脅了!!!!!


進攻中場嘅位置繼續由隊長朗尼出任,其實朗尼今場表現絕非突出,而且上半場多次於其腳下失去控球權,不過也有一記射門被侯城後防球員護空門,而下半場於米希達恩出場後,朗尼更多移到左路出現,而摩連奴此調動也令最重要嘅事發生於費格遜時間的92分鐘,朗尼於底線作突破成功,侯城球員拉也拉不到朗尼後,一個地波傳中讓福仔射入!明顯地,此入球最大功臣當然是隊長朗尼,也能其上半場失準嘅表現一掃而空!真的可以一掃而空嗎?尾段再講!93分鐘由史摩寧入替,只作浪費時間及增加防守力之換人而已!


前鋒嘅伊巴謙莫域,今仗發揮其實不算太差,而且也不時回到中場迎波,也令前場空間更多下,其實曼聯攻勢更加立體,但受天雨影響,埋門一腳總是差一點點,上半場補時階段嘅後踭功架十足不過只中網側!下半場再多次攻門也未能破門,而被馬達打荷包嘅一球,相信是伊巴今場以一套攻門動作做得最靚的了,可惜未能起腳便被馬達偷去腳下球!今仗食白果下,打斷了連續其英超連續入球紀錄!


戰術分析方面,其實今場波也沒有太多挑剔的問題,全場64%控球,攻門次數達28次,但不得不讚侯城防守非常好,雖然今仗能絕殺對手,但其實侯城並未有甚麼大錯,只是輸給了突然青春了的朗尼及真的青春的拉舒福特!可能侯城球員也萬萬估不到,今仗上半場表現不穩嘅朗尼,到補時階段仍可以作突破,不過摩連奴也要留意一下朗尼的狀態,雖然致勝助攻由朗尼傳出,但上半場其失控球權嘅比率真的高,一旦與同級對手對陣時,容易失去控球權是極為危險的事,點解決?摩連奴諗啦!最重要嘅係,今仗於費格遜時間下全取3分,與同樣3戰3勝的曼城於9月初的曼市打比能平分秋色,到時再決一死戰!


鳴謝各位支持K11的文字直播及即討區,國際賽期後再見!


Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/

標籤: 曼聯  侯城  拉舒福特  伊巴  摩連奴  費蘭尼  曼城  英超  迪基亞  普巴  

留言


請按此登錄後留言。未成為會員? 立即註冊
    快捷鍵:←
    快捷鍵:→