[多奇出品] - 20/21賽季曼聯總結 - 球隊之最(中)

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


承接球隊之最(上),今集會講嘅球員有:


最大爭議性球員 - 普巴
原因:論球技,普巴算係世界上其中一個最全面嘅中場球員,佢有身位、左右腳都咁靈活、長傳短傳技巧純熟、又有遠射腳頭,將佢放喺左中場拍住般奴,球隊攻勢同組織可以產生好多變化,而且仲可以減輕般奴嘅負擔。可惜嘅係,普巴防守可以話係一大死穴,尤其喺自己禁區入面,因為佢而輸十二碼都唔少,例如曼聯主場對阿仙奴輸0:1嗰場,就係普巴無謂地喺禁區剷跌比爾連而令球隊輸波。仲有普巴當踢得唔順時,情緒就容易受波動而嚴重阻礙自己嘅發揮。最後就當然要講佢嘅經理人拉奧拿,依個麻煩人同球隊關係差就係人都知,但最令人不滿係歐聯生死戰對萊比錫前嘅一番言論,嚴重影響球隊士氣,結果嗰場比賽曼聯亦都輸咗,所以普巴係咪繼續留隊,球迷都議論紛紛。

最斯文球員 - 連迪洛夫
原因:連迪洛夫喺英超競爭咁激烈,身體碰撞最多最強嘅聯賽竟然無攞到紅、黃牌,可以話係絕無僅有,而佢喺全季各項比賽只係攞到4面黃牌,但佢出場次數有45場而且仲係全部正選,對一名中堅嚟講會唔會真係太少呢?就算係佢嘅拍擋麥佳亞單喺聯賽都有11張啦。當然筆者唔係話中堅越攞得牌多就越威,但有時都要適當地運用犯規嘅空間去阻延對方攻勢。另外,連迪洛夫喺整體主動攔截次數同成功率都比麥佳亞少三分之一,麥佳亞已經唔係主動出擊型中堅,但佢嘅數據都比連迪洛夫多咁多,可想而知連迪洛夫打中堅會唔會真係太斯文。當然打其他歐洲聯賽可能仲可以用技術彌補,但英超就真係有啲勉強。

最體力充沛球員 -費特
原因:只要費特一落場就會捕住對手所控住嘅皮球,對手做決定稍為慢啲,佢就會走過嚟作出攔截或者破壞對方進攻節奏,係一個實幹型嘅球員,就好似費sir年代嘅朴智星,只不過大家打嘅位置有所分別,前者係打防中,後者就打翼為主。而費特喺攔截數據方面亦都十分亮麗,喺球隊入面僅次雲拜沙卡。雖然佢有無限體力,亦都肯走肯搏,但身型同助攻能力不足阻礙佢成為一流球員。身型方面就好難可以改變,但助攻方面希望佢可以下啲苦工,尤其係遠射嘅勁度同命中率,令到自己技術更加全面,亦都可以為球隊爭取入球。

最難擺脫球員 -雲拜沙卡
原因:外號「蜘蛛」嘅雲拜沙卡用翼鋒惡夢嚟形容佢相信無球迷會反對,尤其係曼聯對巴黎聖日耳門嘅比賽,佢對住尼馬係全無懼色,而且令到對手唔能夠隨心所欲地進攻。睇番雲拜沙卡嘅數據,攔截次數有78次,爭波成功次數有210次,而兩項成功率有近6成同超過6成,喺隊中都係排第一,從數據入面睇到雲拜沙卡嘅單對單防守係幾咁厲害。不過,佢喺陣地防守或應付對方兩邊出波需要吸取更多嘅經驗,始終防守高波會係佢其中一個要改善嘅地方。另外,雲拜沙卡嘅助攻仲有進步嘅空間,當然佢依家比季初已經放膽咗,佢喺前場已經做多咗駁腳同出波,希望來季可以見到佢喺進攻方面會更全面。

最捱得球員 - 拉舒福特
原因:筆者咁寫可能有部份球迷會唔認同,佢哋可能會覺得最獨食或者最浪費機會嘅球員就有佢份,點解佢反而係最捱得呢?筆者嘅著眼點係睇佢傷患,受到肩傷、背傷,甚至喺2021年初嘅膝頭傷患影響下仲可以踢到57場比賽,當中有46次係正選,真係唔容易,而且論比賽數據佢亦唔差。佢在各項比賽總共入咗21球12次助攻,喺球隊當中排第二,當然有一點筆者係同意球迷睇法,就係佢做扭波、傳球同射門決定時可以更冷靜地處理。不過,我唔係想故意幫佢講好說話,自己都試過受傷,喺傷患影響下個發揮一定打好大折扣,仲有拉舒福特係靠身體條件優勢去踢波,利用速度同爆炸力去擺脫對手同射門,所以傷患對佢影響就更加深,再加上佢經常成為被侵犯對象,而球隊又無同類型球員可以代替到佢,令佢無休息機會,所以佢嘅職業態度可以話係唔錯,依家只係希望佢可以遠離傷患。

唔經唔覺已經列出咗十位球員之最,嚟緊會出最後一篇,當中會提到領隊蘇B同一啲正副選球員,請大家唔好錯過。


如果大家仍然未申請或想申請NowTV黎睇波,呢條連結有月費低至HK$268.00再有野送嘅計畫益大家:
➡➡bit.ly/RSNowTVSpecialOffer

============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→