由門將質素決定戰果嘅矛盾對碰 [利物浦2:3馬體會賽後感]

英超講場 於 12/03/2020 發表 收藏文章
隨住武漢肺炎波及歐洲各大球會,唔少賽事都因為公眾安全為由改為閉門作賽。好彩琴晚利物浦對馬體會呢場大戰就幸而避過需要閉門嘅要求,係球迷逼爆全場下完成,同另一邊廂巴黎對多仔嘅賽事有好大嘅對比。
係上半場一開波,我地已經可以立刻見到大部分賽前預料嘅局面,亦係接近全場嘅寫照。係一方面扮演矛下另一邊就理所當然成為專注防守嘅盾。紅軍作為尖矛嘅一方係雞聲響之下已經把握每分每秒去壓迫進攻,非常進取。陣型上高普非常積極,叫左前線三叉戟難得地進行拉邊嘅企位,中場線用上隊長軒達臣,張伯倫同韋拿度姆,隊長專注防務同時兩位同為中場線嘅隊友就上上落,攞到波之後插入由文尼同沙拿拉邊下造成嘅half space空間,然後地波傳中,不斷向馬體會禁區施壓。當然係馬體會11人全體大巴情況下實在令利物浦完成到真正破密集嘅效果,加上猜傳並唔係利物浦嘅真正強項,難以猜到入對方禁區再射門,所以驚險嘅鏡頭雖然多,但主要都係依靠兩閘明買明賣高空轟炸為主同埋少量因組織下造成嘅射門威脅,係對方門神加持下令利物浦全場11次中龍下只入到當中嘅兩球,再係運氣都唔幫自己下中左次楣,種種因素埋下被淘汰嘅伏線。
而至於馬體會作為歐洲最佳之盾嘅其一代表,今場又成功做到場代表作。對面每分每秒攻自己嘅時候,佢地就每分每秒做好防守,專注度非常高下成功堵截利物浦唔少嘅危險傳送。施蒙尼就安排場上面所有球員都專注退守,再次排岀442下,就連前鋒線上二人嘅felix同costa都係防守上嘅一員。馬體會球員係指令下企位非常深,令利物浦無得打自己身後,斷對方一條食糊路數,只留翻成功率不高嘅明買明賣以及對方並唔擅長嘅地面滲透。上半場係對方不斷挑戰自己禁區下只走漏對手一次,坦白講係對手如此高強度及快速進攻頻率下,只失一球真係一啲都唔失禮。最為可怕嘅係即使係失波總比數被追和後,床單軍團嘅球員仲非常冷靜,只係比落後前加多左少少壓迫同企位移前,但亦都成功係下半場體力下降下保持到高質素嘅防守,成功令比賽拖入加時。加時雖然只有30分鐘,但亦都充滿住足球最迷人嘅高低起伏。利物浦先以費明奴頂入一球總比分反超馬體會,原以為熱血反勝終要上演,但龍門阿祖安係幾分鐘後犯下致命性嚴重失誤,送對方一個作客入球令到賽事形勢立刻調返轉。利物浦係體力盡失嘅情況被迫壓前下係尾段再輸兩球,宣布衛冕冠軍失敗。
而小編個人認為呢場實屬一場難得精彩非常嘅賽事,雙方教練及球員係合力之下上演左場超水準嘅淘汰賽。利物浦上,我非常欣慰見到平時保守嘅高普今場願意為反cup對手如此積極,少有地有叫球員拉邊嘅同時仲會利用half space空位傳中製造威脅,算係叫做用盡左法寶去嘗試打開對方防守缺口。而球員上正選嘅韋拿度姆同張伯倫都攞岀平時聯賽無咩機會見到嘅超水準表現,兩位瘋狂嘅跑動進攻同迫搶係利物浦能夠長時間維持高強度攻勢嘅原因,而三叉戟同防守球員都有交到合格以上嘅表現,只係對手門神交岀神嘅表現先令比分上無辦法表達到今場紅軍嘅岀色。只係副選門將級數不足送大禮令辛苦90分鐘有多嘅優勢拱手相讓,更殺死自己隊友,係唯一令人失望嘅利物浦球員。
而馬體會上下就要佩服佢地沉得住氣,Lodi同英超過黎嘅tripper係邊路嘅活躍令沙拿同文尼都有啲唔順,為球隊防守貢獻唔少,最岀色嘅就當然係我已經提左多次嘅oblak,9次成功撲救下拯救左捱打左成場嘅隊友同對手龍門尷尬地形成強烈對比,而最可惜亦係龍門呢個位置上改變左今場最終賽果。
雖然利物浦岀局,但慶幸今季佢地好大機會有聯賽冠軍做翻安慰,希望高普會著手留意球隊破密集弱嘅問題加強翻球隊創造性唔好只靠明買明賣同體力去贏得比賽,相信買翻一兩位適當補強及保持現今隊伍框架下,下年必定可以卷土重來。而馬體會就睇下佢地呢塊最強嘅盾可唔可以擋到自己捧盃啦!

留言


請按此登錄後留言。未成為會員? 立即註冊
    快捷鍵:←
    快捷鍵:→