朝聖東京 - 鹿島鹿角篇

朝聖話咁易 於 22/06/2018 發表 收藏文章
早前睇到一篇新聞,話說亞冠盃16強首回合鹿島鹿角主場迎戰上海上港,有個內地球迷想親身去到鹿島鹿角主場支持一下作客既上海上港。死忠球迷作客支持愛隊,成件事係十分熱血。但奈何,個位球迷事前準備不足,又或者地理知識唔係咁夠。以為鹿島鹿角既主場位於鹿兒島,結果買左張機票去鹿兒島。成件事就當場就變左個笑話。

《有關新聞詳情,可到以下連結》
https://hk.sports.appledaily.com/sports/realtime/article/20180509/58171854

小弟上年有幸到過鹿島鹿角既主場觀看亞冠盃賽事,好彩事前做足準備,所以買岩左機票。係度要重申一次,鹿島鹿角既主場係位於東京附近,而唔係鹿兒島呀!
《球場位置位於東京市東北面》
鹿島鹿角主場名為茨城縣立鹿嶋足球場〈茨城県立カシマサッカースタジアム〉,位於茨城縣鹿嶋市,東京市東北面,容納人數40,728人。係2002年日韓世界盃其中一個比賽場地,曾經舉辦過三場分組賽賽事,分別係德國1:1愛爾蘭、阿根廷1:1尼日尼亞及意大利1:2克羅地亞。

《場外景色》

《場內景色》

前往方法 :出發前網上進行搜索,經過一輪深入考究以及有心人的提點下。發覺前往球場既最好方法係由東京車站乘坐高速巴士。

每日都有若干班次既高速巴士來往東京站同鹿島神宮,上車位置係東京站八重洲南口既一號站頭。倘若當日有鹿島鹿角既主場賽事,巴士線大多數以茨城縣立鹿嶋足球場作為總站。車程大約2小時,同坐鐵路相比下,應該會方便得多!

《東京站八重洲南口的一號站頭》

可能茨城縣立鹿嶋足球場係2002年日韓世界盃主辦場地既關係,無論球場規模,外型及軟件方面都相當唔錯,係一個值得朝聖既地方。球迷們亦可以預早於開賽前1,2 小時到達,場內有各種各樣既美食及紀念品攤位恭候大家。

《球場內的紀念品攤檔》

茨城縣本身唔係有太多既旅遊景點,相信黎到日本既旅客應該唔會特別編排行程係縣內留宿。倘若要到茨城縣立鹿嶋足球場觀賞足球比賽既朋友﹝特別係晚上進行的賽事﹞,可以唔駛專登係茨城縣租住酒店。事關回程方面係有高速巴士提供前往東京站,上車地點正正係去程既落車地點,因為無中途站既關係,所以回程所用既時間比去程少,東京市即日來回可以話綽綽有餘。

《場外夜景靚到‧‧‧‧‧‧》

最後,要係度再三重複一次,鹿島鹿角既主場係近東京架!唔係鹿兒島呀!
標籤: 朝聖  東京  鹿島鹿角  J league  

留言


請按此登錄後留言。未成為會員? 立即註冊
    快捷鍵:←
    快捷鍵:→