乜你咁熟口面既!

如果有人問,愛華頓近年最成功既領隊係邊個?我相信大部分人會答:「椰絲」莫耶斯 (David Moyes)。
咁韋斯咸呢?應該都會係英格蘭國家隊領軍戰績最好(勝出率100%)又最短命(67日),人稱Big Sam既艾拿戴斯 (Sam Allardyce)。

心水清既可能已經可能估到我下一句係乜:咁請問而家執教緊兩隊既教練又係邊個呢?
咪就係上個月上任護緊級既韋斯咸既「椰絲」同埋上星期先出任愛華頓既大Sam囉,可惜上周中愛華頓大炒韋斯咸4粒嗰場,大Sam先啱啱同意出任執教,如果唔係就可以唔駛用張起碼5年既相做標題圖。

今年英超「開咧」到而家差唔過咗一半,一共就有5隊為咗保住英超席位而已經換咗教頭,依次分別係:
1. 水晶宮 [法蘭.迪保亞 (Frank de Boer) -> 鶴臣 (Roy Hodgson)]
2. 李斯特城 [莎士比亞 (Craig Shakespeare) -> 佩爾 (Claude Puel)]
3. 愛華頓 [朗奴·高文 (Ronald Koeman) ->艾拿戴斯 (Sam Allardyce)]
4. 韋斯咸 [比歷 (Slaven Bilic) -> 莫耶斯 (David Moyes)]
5. 西布朗 [佩利斯 (Tony Pulis) -> 柏祖 (Alan Pardew)]
新教頭入面啱啱提過「交換東家」既大Sam同椰絲之外,其他三位上一隊執教既球會都係英超既球會。唔計「學神」,其他四位上一季都教過另一隊英超球會。
再睇番近呢幾年英超落馬上馬既教練名,原來黎黎去去都係嗰幾個。

點解會咁?因為錢囉。留喺英超會分到好高奬金囉。有幾多?咁講啦,上年英超包尾嗰隊既新特蘭分到8.5千萬磅(8.8億k港幣),而上年拎到歐聯冠軍既皇馬得到幾多奬金呢?答案係8.9千萬歐羅(8.2億港幣),係計埋所有出場費同埋冠軍奬金總共加埋先8億喎。換句話講,即係如果入到歐聯,但係之後嗰年要降班,係可能會比連續兩年都踢英超所得既錢少。

真係錢咁簡單?原來降咗班真係唔係話升番上黎就升番上黎,不如睇下今年暫時既英冠積分榜。
留意吓中下游既球隊,都不少近年曾戰於英超既球隊:雷丁、富咸、諾域治、昆士柏流浪、侯城、保頓、伯明翰同埋上年先降班既新特蘭,都唔係佰生既名。
係咪搵唔到前幾年先(終於)降班既韋根呢?韋根上年降咗落英甲,不過今季暫時喺英甲踢得唔錯,排緊榜首既。順便一提,曾經贏過英超冠軍(1994-95)既布力般流浪同千禧年其間踢英超既查爾頓同樸茨茅夫而家都係喺英甲作賽。

既然係咁,咁換領隊又有咩問題?又有乜結論?
問題1:人係會死既,咁玩多幾年,邊個仲有經驗護級先?
問題2:二十隊梗有三隊要降班,換親教頭就一定會換下血,但係咁樣換教頭法,一降班,一清洗,剩低既又夠唔夠踢英冠呢?(睇下新特蘭)
結論1:咁黎黎去去都係嗰D教練,新晉教頭(尤其係英國本地)點先可以教英超?由英冠升班囉。(好似般尼茅夫既賀維(Eddie Howe)咁)
結論2:唔駛好耐應該會喺場邊見番佩利斯。(如果係上年佩爾教過既修咸頓,咁就又黎一對「交換東家」囉)(聖迷不要殺我)

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→