港隊賽後筆記:印尼 1-1 香港

場邊筆記 於 16/10/2018 發表 收藏文章
加利韋特領軍第二場,港隊終於取得首個入球,不過仍然有待打開勝利之門。呢兩場友誼賽睇嚟,港隊踢4–4–2應該都係走唔甩,咁就講下踢呢個陣容之下,港隊有咩要改進:

傳送能力
不論係中後場嘅長傳,抑或兩翼傳中,港隊都有好多傳送失誤。除咗浪費控球權之外,亦俾對手有好多打反擊嘅機會。中場方面,鞠盈智或者胡晉銘可以係加利韋特考慮嘅人選;但係兩翼除咗徐德帥,要搵一個傳中好嘅翼鋒真係比較頭痕。

後防年輕化
丹尼應付速度型翼鋒確實相當吃力,法圖斯雖然有入波,但係失球亦有一定責任。兩人已經分別37同38歲,港隊唔搵定替代人選嘅話,唔單止係接班嘅問題,對付行軍速度快嘅球隊都會有相當大嘅隱憂。兩閘嘅人選相對地會多啲,但係法圖斯呢類包位嘅中堅就真係比較難搵,或者加利韋特可以用徐宏傑試下。

前線組合
艾力士搭基奧嘅化學作用接近係零。基奧可以喺對較弱嘅球隊嗰陣,用嚟衝散對手防線;至於艾力士就可以放喺最前點負責突破,但係兩個同場嘅效果真係差到不得了。

相反,辛祖配住基奧雲尼嘅時候就真係踢到風生水起,停波、走位、入楔乜都有齊,如果基奧雲尼嘅體力應付到踢正選嘅,加利韋特應該試下。

至於黃威同中村祐人嘅定位,加利韋特應該尚需時間摸索,中場中或者後上前鋒,預期應該會係佢地嘗試嘅位置。最後,如果港隊要有兩翼進攻嘅話,麥基真係要收起。

留言


請按此登錄後留言。未成為會員? 立即註冊
    快捷鍵:←
    快捷鍵:→